Almaty oblysynda jasyryn esirtki zerthanasy joıylyp, 125 myń doza tárkilendi
ASTANA. KAZINFORM — Іshki ister mınıstrligi esirtki bıznesine qarsy kezekti iri soqqy jasady, dep habarlaıdy Polisia.kz.
Jedel-izdestirý is-sharalary barysynda Almaty oblysynyń Qarasaı aýdanynda jasyryn esirtki zerthanasy anyqtalyp, joıyldy. 29 jastaǵy kúdikti jeke úıdi sıntetıkalyq esirtki óndiretin zerthanaǵa aınaldyrǵan. Qajetti jabdyqtar men hımııalyq reagentterdi jetkizý, sondaı-aq esirtki daıyndaý protsesi ınternettiń kóleńkeli segmenti arqyly júrgizilgen. Tintý kezinde 28 keliden astam α-PVP, 880 lıtr prekýrsor jáne arnaıy zerthanalyq jabdyqtar tárkilendi.
— Daıyn sıntetıka óndirilgen alǵashqy partııa bolǵan. Onyń kólemi shamamen 125 myń bir rettik dozaǵa teń. Polıtsııanyń jedel ári kásibı áreketiniń arqasynda bul zattardyń eshqaısysy zańsyz aınalymǵa túsken joq. Osylaısha myńdaǵan adamnyń esirtkige táýeldi bolýyna jol berilmedi. Halyq densaýlyǵyna keler zııan toqtatyldy. Іs júzinde óńirdegi krımınogendik ahýalǵa eleýli qaýip tóndiretin «esirtki ortalyǵy» joıyldy. Bul fakt boıynsha QR Qylmystyq kodeksiniń 297-1-babymen sotqa deıingi tergep-tekserý júrgizilip jatyr. Baptyń sanktsııasy ómir boıyna bas bostandyǵynan aıyrý jazasyna deıin kózdeıdi. Іshki ister mınıstrligi esirtki qylmystaryna qarsy kúres memlekettik saıasattyń basym baǵyttarynyń biri ekenin atap ótedi. Esirtki óndirý men ony satýǵa qatysty kez kelgen áreket qatań túrde toqtatylatyn bolady, — dedi QR ІІM esirtki qylmysyna qarsy is-qımyl komıteti tóraǵasynyń orynbasary Eldar Ábdikenov.
Buǵan deıin Kazinform tilshisi elordalyq mamandar esirtkige táýeldilikke jáne esirtki qylmysyna qarsy qalaı kúresip jatqanyn zerttep kórgen edi.
