Almaty oblysynda jasyryn esirtki zerthanasy tabyldy

ASTANA. KAZINFORM - Іshki ister mınıstrligi «Zań men Tártip» qaǵıdaty boıynsha jumysty jalǵastyryp jatyr, - dep jazdy Polisia.kz.

Shý qalasynan Almaty oblysyna «baqylanatyn jetkizý» ádisimen júrgizilgen arnaıy operatsııanyń nátıjesinde Qarasaı aýdanynyń «Turar baqshasy» eldimekeninde jasyryn esirtki zerthanasynyń qyzmeti toqtatyldy. Sıntetıkalyq esirtkilerdi óndirý jáne taratýmen aınalysqan qylmystyq shemany kórshi eldiń eki azamaty uıymdastyrǵan.

- Jedel is-sharalar barysynda zańsyz aınalymnan 11 keliden astam sıntetıkalyq «mefedron» esirtkisi tárkilendi. Nátıjesinde aınalymǵa quny 1,6 mln AQSh dollaryn quraıtyn shamamen 35 myń bir rettik dozanyń túsýine jol berilmedi. Sonymen qatar zerthanaǵa júrgizilgen tintý barysynda 20 lıtr jáne 115 kg psıhotroptyq zat, sondaı-aq eki tonnadan astam prekýrsor tárkilendi. Olardy óńdeý arqyly 120 kg sıntetıkalyq esirtki daıyndaý josparlanǵan. Qylmystyq ortaǵa 17,5 mln AQSh dollary kóleminde zalal keltirildi. Ustalǵandar ýaqytsha ustaý ızolıatoryna qamaldy. Bul baǵyttaǵy jumys jalǵasyp jatyr, - dedi ІІM esirtki qylmysyna qarsy is-qımyl komıteti tóraǵasynyń mindetin atqarýshy Danııar Meıirhan.

Aıta keteıik, Qazaqstanda jyl basynan beri 4 tonnadan astam esirtki tárkilendi.