Almaty oblysynda jarty jylda 1,5 myń jol-kólik oqıǵasy boldy

QONAEV. KAZINFORM — Almaty oblysynda «Qaýipsiz jol» is-sharasy aıasynda polıtsııa qyzmetkerleri zamanaýı tehnıkalyq quraldar arqyly reıdter júrgizip jatyr.

Oblystyq polıtsııa departamentiniń málimetinshe, 2025 jyldyń alǵashqy jartyjyldyǵynda óńirde 1447 jol-kólik oqıǵasy tirkelgen. Odan bólek bıyl jol qozǵalysy erejelerin buzýdyń 110 myńǵa jýyq deregi anyqtalǵan. Atap aıtqanda, tehnıkalyq aqaýy bar kólik júrgizý — 11 029 jaǵdaı, toqtaý jáne turý erejelerin buzý — 2542 jaǵdaı, qarsy jolaqqa shyǵý — 615 jaǵdaı, mas kúıde kólik júrgizý — 479 jaǵdaı, jaıaý júrginshilermen baılanysty buzýshylyqtar — 13 697 jaǵdaı.

Jol erejelerin buzý derekterin anyqtaý jáne aldyn alý úshin oblystyq polıtsııa zamanaýı tehnologııalardy paıdalanyp jatyr.

— Talǵar tas jolynda birneshe tehnıkalyq quraldardy qamtıtyn jasyryn patrýldeý júıesi engizilgen. Drondar — áýeden qaýipti manevrler men qarsy baǵytqa shyǵý jaǵdaılaryn baqylap túsiredi, EKIN PATROL júıesi — kólik nómirlerin avtomatty túrde anyqtap, jyldamdyqty asyrý, tehnıkalyq baıqaýdan ótpeý, saqtandyrý polısiniń bolmaýy sekildi quqyqbuzýshylyqtardy tirkeıdi. Al jasyryn patrýlder — arnaıy belgileri joq avtokólikter, olar naqty ýaqyt rejıminde júrgizýshilerdiń áreketterin baqylap, polıtsııanyń tikeleı qatysýynsyz óreskel zańbuzýshylyqtardy tirkeı alady, — dep habarlady departamentten.

Eske salaıyq, buǵan deıin Almatyda júk kóligi, 3 jeńil kólik jáne avtobýs soqtyǵysyp, 23 adam zardap shekkenin jazǵanbyz.