Almaty oblysynda jarylys týraly jalǵan habarlama taratqan oqýshylar ustaldy
ASTANA. KAZINFORM – Polıtsııa jarylys, órt qoıý jáne basqa da qaýipter týraly jalǵan habarlamalar taratqandar qylmystyq jaýapkershilikke tartylatynyn eskertti, dep habarlaıdy Polisia.kz.
ІІM málimetinshe, ınternet pen áleýmettik jelilerde jasóspirimderdiń jalǵan habarlamalar taratý derekteri jıilegen.
Almaty oblysynda terrorızm aktisi týraly kórineý jalǵan habarlama jasaǵany úshin 9-synyptyń eki oqýshysy ustaldy. Tergeý barysynda olardyń Astana qalasy men Almaty oblysyndaǵy osyndaı 14 faktige qatysy bary anyqtalǵan.
Sonymen qatar Shyǵys Qazaqstan oblysyndaǵy 9-synyp oqýshysy áleýmettik jelidegi janjaldan keıin basqa adamdardyń atynan Shymkent qalasy ákimdigi men Aqtaýdaǵy saýda úıleriniń birine jarylǵysh zat qoıylǵany týraly elektrondyq hattar jibergen.
Quqyq qorǵaý organdarynyń málimetinshe, olar qylmys jasaý kezinde anonımdi telefon nómirleri men elektrondyq poshtalardy paıdalanǵan.
– Bul «ázil» nemese qaljyń bolsa da, mundaı áreketter qylmystyq quqyq buzýshylyq bolyp sanalady. Jalǵan qaýip týraly habarlamalar adamdar arasynda dúrbeleń týǵyzyp, shuǵyl qyzmetterdiń jumysyna kedergi keltiredi. Mundaı áreketter úshin bas bostandyǵynan aıyrýǵa deıin jaýapkershilik qarastyrylǵan, – dedi Aman Áýbákirov.
ІІM Kıberqylmysqa qarsy is-qımyl departamenti basqarma bastyǵynyń orynbasarynyń aıtýynsha, mundaı jaǵdaılardyń barlyǵy muqııat tekserilip, kúdiktiler zamanaýı tehnologııalardyń kómegimen anyqtalady.
Polıtsııa azamattardy tekserilmegen aqparat taratpaýǵa jáne balalarǵa mundaı áreketterdiń saldaryn túsindirýge shaqyrdy.
Aıta keteıik, ІІM terrorızm týraly jalǵan aqparat taratqandar da qylmystyq jaýapqa tartylatynyn málimdedi.
