Almaty oblysynda jańartylǵan temirjol stansasy paıdalanýǵa berildi
QONAEV. KAZINFORM – Almaty oblysy Jambyl aýdanynda temirjol beketi jańǵyrtýdan ótti.
Jambyl aýdany ákimdiginiń málimetinshe, tolyqtaı jańartylǵan Qazybek bek temirjol stantsııasy búgin paıdalanýǵa berildi. Tapsyrys berýshi - «Qazaqstan temir joly» AQ» UK, al merdiger uıym - «Kerneý K» JShS.
Jańǵyrtý barysynda stantsııa ǵımaraty 82 sharshy metrden 214 sharshy metrge deıin keńeıtilgen.
- Jolaýshylardyń jaılylyǵy men qaýipsizdigin arttyrýǵa baǵyttalǵan keshendi qurylys-montaj jumystary júrgizildi.
Vokzal ǵımaratynyń qasbeti men ishki bólmeleri jańartylyp, ınjenerlik jeliler, jylytý, sýmen jabdyqtaý jáne elektrmen qamtý júıeleri jańǵyrtyldy, - dep habarlady aýdan ákimdigi.
Sonymen qatar stantsııa zamanaýı talaptarǵa saı jabdyqtalyp, jolaýshylar úshin qolaıly kútý aımaqtary uıymdastyrylǵan. Navıgatsııalyq júıe jetildirilip, júrip-turýy shekteýli azamattar úshin qoljetimdi orta qalyptastyryldy.
Eske salaıyq, buǵan deıin Aqmola oblysynda Jaqsy temirjol vokzalynyń ǵımaratyn rekonstrýktsııalaý jumystary aıaqtaldy.
