Almaty oblysynda janarmaı quıý beketine qaraqshylyq shabýyl jasaldy
ASTANA. KAZINFORM — Almaty oblysynda polıtsııa janarmaı quıý beketine jasalǵan qaraqshylyq shabýyldy áshkereledi.
Almaty oblysynda polıtsııa qyzmetkerleri janarmaı quıý beketine jasalǵan qaraqshylyq shabýyldy izin sýytpaı ashty. Kúdiktilerdi anyqtaýda Jedel basqarý ortalyǵynyń qyzmetkerleri zııatkerlik beınebaqylaý júıesiniń kómegimen kúdiktilerdiń júrip ótken baǵytyn jedel qalpyna keltirip, olardyń jeke basyn anyqtady.
Qylmys týraly habarlama túsken boıda Jedel basqarý ortalyǵynyń qyzmetkerleri kúdiktilerdiń yqtımal qozǵalys baǵyty boıynsha ornatylǵan beınebaqylaý kameralaryndaǵy jazbalardy taldaýǵa dereý kiristi. JBO operatorlary men polıtsııanyń jedel bólimsheleriniń úılesimdi jumysynyń nátıjesinde qysqa merzim ishinde qaraqshylyq shabýylǵa qatysy bar eki adamnyń da jeke basy anyqtaldy.
Jedel-izdestirý is-sharalary barysynda kúdiktiler ustalyp, ýaqytsha ustaý ızolıatoryna qamaldy.
— Atalǵan derek boıynsha polıtsııa qyzmetkerleri qaraqshylyq shabýyl faktisi boıynsha qylmystyq isti tergep jatyr. Oqıǵanyń barlyq mán-jaıy jan-jaqty anyqtalady, — deıdi polıtsııa.
Eske salaıyq, buǵan deıin Jambyl oblysynda 8 jyl buryn bolǵan qaraqshylyq qylmys ashylǵanyn habarlaǵan edik.
