Jalǵan kooperatıv quryp, 1,2 mlrd teńge sýbsıdııa alǵan: Almas Sadyrbaı ustaldy

ASTANA. KAZINFORM – Qarjylyq monıtorıng agenttiginiń Almaty oblysy boıynsha departamenti oblystyq prokýratýramen birlesip, «Shańyraq» qoǵamdyq birlestiginiń basshysy A.Sadyrbaıdyń asa iri mólsherde aqsha jymqyrýmen baılanysty alaıaqtyq áreketin áshkereledi.

Agenttiń bapasóz qyzmetiniń habarlaýynsha, A.Sadyrbaı basqaratyn adamdar toby Balqash, Eńbekshiqazaq, Kegen, Raıymbek jáne Uıǵyr aýdandarynda jalǵan aýyl sharýashylyǵy kooperatıvterin qurdy degen kúdik keltirilip otyr.

Negizgi maqsat - usaq maldyń analyq basyn uryqtandyrýǵa sýbsıdııalardy zańsyz alý jáne jemshóp shyǵyndaryn óteý. Bul úshin zańnamaǵa qaıshy aýylsharýashylyq jerleri joq sharýa qojalyqtary tartyldy.

Budan ári jalǵan kadastrlyq nómirlerdi kórsete otyryp, dáıeksiz málimetterdi qamtıtyn sýbsıdııalar alýǵa ótinimder qashyqtan berildi.

Bul rette aýyl sharýashylyǵy kooperatıvteri basshylaryn habardar etpeı, olardyń ETsQ-sy paıdalanyldy.

«Osylaısha 1,2 mlrd teńgeden astam qarajat urlanǵan. A.Sadyrbaı ustaldy. Onyń sybaılasy tergeý sotynyń sanktsııasymen úı qamaýynda. QPK-niń 201-babyna sáıkes ózge de málimetter jarııa etilýge jatpaıdy»,-delingen habarlamada.

Aıta keteıik, QMA Memleket basshysynyń Joldaýynda belgilengen sýbsıdııalardy alý kezinde derekterdi burmalaý faktileriniń jolyn kesý boıynsha júıeli jumysty jalǵastyrýda.

Osyǵan deıin Aqtóbe oblysynda alaıaqtar sýbsıdııaǵa bólingen 1 mlrd teńgege jýyq qarjyny jymqyrǵanyn jazǵan edik.