Almaty oblysynda zańsyz júrgen 50 sheteldik elden shyǵaryldy

QONAEV. KAZINFORM - Almaty oblysynda kóshi-qon zańnamasynyń saqtalýyn baqylaý boı̆ynsha jedel-profılaktıkalyq is-sharalar aıaqtaldy. Onyń qorytyndysy boı̆ynsha 50 sheteldik zań buzýshylyqtar úshin elden shyǵaryldy.

– Іs-sharalar barysynda buzýshylyqtardyń 1037 faktisi anyqtaldy. Buzýshylyqtardyń kópshiligin, 1001 jaǵdaı̆dy, TMD elderiniń azamattary, taǵy 36–syn alys shetelderdiń azamattary jasady. Negizgi problemalar ruqsat etilgen merzim aıaqtalǵannan keı̆in (449 jaǵdaı̆) elden ýaqtyly ketpeý jáne 10 kúnnen artyq (480 jaǵdaı̆) ketýden jaltarý boldy. Sondaı̆-aq, zańsyz eńbek qyzmetine baı̆lanysty 85 buzýshylyq tirkeldi, – dedi oblystyq PD Kóshi-qon qyzmeti basqarmasynyń bastyǵy Rústem Jaryqbasov.

Budan basqa, tekserý nátıjesinde sheteldikterdi qabyldaǵan jeke jáne zańdy tulǵalardy qosa alǵanda 237 adam zańnamany saqtamaǵany úshin ákimshilik jaýapkershilikke tartyldy. 5 kún ishinde 481 adam esepke alyndy, al 23 buzýshy qabyldaý-taratý ornyna ornalastyryldy. Tórt buzýshylyq faktisi boı̆ynsha qylmystyq is qozǵaldy.

Eske salaıyq, buǵan deıin Almatyda bıyl 2 myńǵa jýyq sheteldik deportatsııalanǵanyn jazǵanbyz.