Almaty oblysynda zańsyz salynǵan nysandar buzylyp jatyr
QONAEV. KAZINFORM - Almaty oblysynda zańsyz qurylyspen kúres jalǵasýda.
Almaty oblystyq sáýlet-qurylys memlekettik baqylaý basqarmasynyń basshysy Qaıyrjan Jaqsymbetovtyń aıtýynsha, ótken jyly 711 ákimshilik is qozǵalyp, nátıjesinde 5 nysandy buzý týraly sheshim qabyldanǵan.
Sot sheshimimen Qarasaı aýdanyndaǵy «Orda Town» kópqabatty turǵyn úı kesheni, Eńbekshiqazaq aýdanyndaǵy kirpish zaýyty, Talǵar aýdany Baıbulaq aýylyndaǵy eki kópqabatty turǵyn úı kesheni buzyldy. Taǵy tórt nysan súriledi, al bireýi boıynsha sheshim áli qabyldanǵan joq.
«Sonymen qatar Kegen aýdanyndaǵy Kólsaı kóliniń jaǵasynda meıramhana men 8 qonaqúı kesheni qurylysynyń zańdy ne zańsyz salynǵany anyqtalyp jatyr», - dep habarlady oblystyq basqarmadan.
Jalpy, 2024 jyly Almaty oblysynda zańsyz qurylys faktileri boıynsha jalpy somasy 34 mıllıon teńgeden astam 128 ákimshilik is qaralyp, 59 is sotqa joldandy.
Byltyr 484 is qaralyp, aıyppul somasy 140 646 150 teńge boldy. Máselen, ár túrli baǵyt boıynsha QR bıýdjettik nysandary týraly zańynyń talaptaryn buzǵany úshin 56 merdiger uıymǵa 27 848 820 teńge aıyppul salynyp, onyń ishinde 2 lıtsenzııanyń kúshi joıyldy, 2 lıtsenzııanyń qoldanylýy toqtatyldy.
«23 tehnıkalyq baqylaý uıymy men 9 akkredıttelgen tehnıkalyq qadaǵalaý uıymyna 21 963 436 teńge aıyppul salynyp, 22 attestattyń qoldanysy 6 aıǵa toqtatyldy, 1 attestat pen 2 akkredıtteý komıssııasynyń kúshi sot sheshimimen joıyldy. 18 sáýlet qadaǵalaý birligine 8 505 468 teńge aıyppul salynyp, onyń ishinde 3 sáýlet qadaǵalaýynyń aktisi joıyldy. Akkredıttelgen 3 kompanııaǵa 2 587 500 teńge aıyppul salyndy», - delingen habarlamada.
