Almaty oblysynda zańsyz salynǵan dúken buzyldy
QONAEV. KAZINFORM — Eńbekshiqazaq aýdanynyń soty Báıterek aýylynda zańsyz salynǵan dúkendi buzý týraly sheshim shyǵardy.
Almaty oblysynyń memlekettik sáýlet-qurylys baqylaý basqarmasynyń málimetinshe, qurylysqa tapsyrys berýshi Eńbekshiqazaq aýdany, Báıterek aýyly, Esik-2, 16-lınııa №482 mekenjaıy boıynsha dúkendi qajetti ruqsat qujattarysyz salǵan.
Atap aıtar bolsaq, nysan qurylysy jer ýchaskesine quqyǵysyz, jobalyq-smetalyq qujattamasyz, avtorlyq jáne tehnıkalyq qadaǵalaýsyz, sondaı-aq qurylys-montaj jumystaryn bastaý týraly habarlamasyz júzege asyrylǵan.
«2024 jyldyń 5 maýsymynda sot tapsyrys berýshini QR ÁQBtK-niń 319-baby boıynsha ákimshilik quqyq buzýshylyq jasaǵany úshin kináli dep tanyp, ony 55 380 teńge kóleminde aıyppul tóleýge jáne zańsyz qurylysty májbúrlep buzýǵa sheshim shyǵardy. Osylaısha, 28 maýsymynda obekt tapsyrys berýshiniń erkimen buzyldy»,- dep habarlady basqarmadan.
Sondaı-aq Almaty oblysynyń memlekettik sáýlet-qurylys baqylaý basqarmasy protsessýaldyq sheshim qabyldaý úshin aýdanaralyq ákimshilik jáne aýdandyq sottaryna 10 ákimshilik materıaldy joldady. Olardyń ishinde 8 óz betinshe salynǵan nysan buzylýǵa jatqyzyldy, al 2 is áli qaralyp jatyr.
Budan bólek, mamandandyrylǵan aýdanaralyq ekonomıkalyq sotyna qajetti ruqsat qujattarysyz salynǵan 5 nysandy buzý týraly talap aryz berildi. Bul nysandardyń 4-ne buzý týraly sheshim shyǵarylyp, bir is boıynsha óndiris júrgizilýde.
Buzý týraly naqty sheshimder kelesi nysandarǵa qatysty shyǵaryldy:
1. Qarasaı aýdany Raıymbek aýyldyq okrýgi, Abaı aýylyndaǵy "OrdaTown" kópqabatty turǵyn úı kesheni (oryndaý paraǵy kórsetilmegen).
2. Eńbekshiqazaq aýdany, Esik qalasyndaǵy «Altyn-Bóbek» bóbekjaı-balabaqshasy» JShS (basseın) sport kesheni (ýaqytsha toqtatylǵan).
3. Talǵar aýdany Alataý aýyldyq okrýgi Baıbulaq aýylyndaǵy kóppáterli turǵyn úı kesheni (sheshim zańdy kúshine endi, sot oryndaýshysyna jiberildi).
4. Sol aýdannyń taǵy bir kóppáterli turǵyn úı kesheni, munda da sheshim zańdy kúshine endi jáne sot oryndaýshysyna jiberildi.
Sondaı-aq, Kegen aýdany, Saty aýyldyq okrýgi, Kólsaı kóli jaǵalaýyndaǵy meıramhana jáne qonaqúı kesheniniń qurylysy boıynsha is sotta qaralýda. Kegen aýdandyq sotynyń talap aryzdy qanaǵattandyrýdan bas tartý týraly sheshimine apellıatsııalyq shaǵym berildi.
