Almaty oblysynda zańsyz saqtalǵan 40-tan astam qarý tapsyryldy

QONAEV. KAZINFORM – Almaty oblysynda zańsyz saqtalǵan atys qarýy, oq-dáriler men jarylǵysh zattardy erikti túrde tapsyrý aktsııasy ótip jatyr. 

Almaty oblysy polıtsııa departamentiniń málimetinshe, azamattyq jáne qyzmettik qarý aınalymyn baqylaý tobynyń qyzmetkerleri turǵyndar arasynda aýqymdy túsindirý jumystaryn júrgizgen. 

– Biz oblys turǵyndarymen 46 kezdesý ótkizip, zańsyz saqtalǵan qarýdy erikti túrde tapsyrý jáne qarý ıelerine aqshalaı syıaqy tóleý tártibi týraly tolyq túsindirme berdik. Azamattardyń yńǵaıy úshin qalalyq jáne aýdandyq polıtsııa bólimderinde, sondaı-aq HQKO, bazar jáne oıyn-saýyq ortalyqtary syndy halyq kóp shoǵyrlanatyn oryndarda úgit-nasıhat materıaldary ornalastyryldy. Budan bólek barlyq polıtsııa bólimderine halyqqa taratý úshin arnaıy jadynamalar berildi, - dep habarlady departamentten.

Oblystyq polıtsııa málimetinshe, bıyl 25 shildege deıin 31 azamattan ótinish túsip, olar 41 qarýdy tapsyrǵan. Onyń ishinde, 35 – tegis uńǵyly qarý, 1 – travmatıkalyq qarý jáne 5 – oıyq uńǵyly qarý.

Zańsyz saqtaýdaǵy qarýdy erikti túrde tapsyrǵan 25 azamatqa jalpy somasy 3 007 980 teńge kóleminde aqshalaı syıaqy tólendi.

Eske salaıyq, SQO-da 15 jasar jasóspirim qoldan jasalǵan qarýmen atylyp qaldy.