Almaty oblysynda zańsyz qarý men ańshylyqqa qatysty 6 qylmystyq is qozǵaldy

QONAEV. KAZINFORM — Almaty oblysynyń aýmaǵynda aqpan aıynda «Brakoner» jedel-profılaktıkalyq is-sharasy ótkizildi.

Oblystyq polıtsııa departamentiniń málimetinshe, zańsyz ań aýlaý men balyq aýlaý derekteriniń aldyn alý, sondaı-aq qarý qoldanýǵa qatysty zańsyz áreketterdi anyqtaýǵa baǵyttalǵan reıdter barysynda oblys boıynsha barlyǵy 362 quqyq buzýshylyq anyqtalǵan. Onyń ishinde 282 derek — ań aýlaý erejelerin buzý, 53 derek — balyq aýlaý talaptaryn buzý, 21 derek — tabıǵatty qorǵaý zańnamasyn buzý. Atalǵan 21 derektiń 15-i azamattyq ańshylyq qarýdy saqtaý erejelerin buzý bolsa, altaýy qarýdy zańsyz ıelený faktileri.

— Anyqtalǵan zań buzýshylyqtar boıynsha 6 qylmystyq is qozǵaldy. Olardyń ishinde balyq resýrstaryn jáne basqa da sý janýarlaryn zańsyz alý, zańsyz ań aýlaý, sırek kezdesetin jáne joıylyp ketý qaýpi tóngen janýarlar men ósimdikterge qatysty zańsyz áreketter, sondaı-aq aǵashtar men butalardy zańsyz kesý nemese búldirý faktileri bar, — dep habarlady departamentten.

Sonymen qatar, ákimshilik quqyq buzýshylyqtar boıynsha da tıisti sharalar qabyldanyp, quqyq buzýshylar zańnama talaptaryna sáıkes jaýapkershilikke tartylǵan.

Eske salaıyq, buǵan deıin Almatyda zańsyz aýlanǵan 700 keli balyq anyqtalǵanyn jazǵanbyz.