Almaty oblysynda úshem emhanada shetinep ketti
QONAEV. KAZINFORM — Almaty oblysy Qaskeleń qalasynda áıel júktiliktiń 25-aptasynda úshem bosandy. Alaıda salmaǵy tym az bolǵan náresteler shetinep ketti.
Qarasaı klınıkalyq kópsalaly ortalyq aýdandyq aýrýhanasy málimetinshe, áıel Jambyl aýdany Uzynaǵash aýylynyń turǵyny jáne sonda esepte turǵan. Júktilik kezinde ol turǵylyqty jeri boıynsha birneshe ret balany saqtaý terapııasynan ótken.
18 shildede saǵat 03:00 shamasynda tolǵaǵy bastalǵan áıeldi jedel járdem brıgadasy aýrýhanaǵa jetkizgen.
— Jatyrda úshemniń bolýyn, tolǵaq pen qaǵanaq sýynyń ketkenin eskere otyryp, patsıentti basqa klınıkaǵa aýystyrý múmkin bolmady. Mundaı klınıkalyq jaǵdaı ana úshin de, balalar úshin de óte joǵary qaýip-qater tóndiredi. Onyń ishinde jyldam bosaný, platsentanyń ajyraýy, kindiktiń túsip ketýi jáne ınfektsııanyń damýy yqtımal. 25-aptalyq merzimde úshem bosaný — asa qaýipti jaǵdaı jáne shuǵyl shara qabyldaýdy talap etedi. Osyǵan baılanysty júkti áıel aýrýhanaǵa jatqyzyldy, — dep túsindirdi aýrýhana ókilderi.
Saǵat 07:00 shamasynda áıel úshemdi bosanǵan. Emhana málimetinshe, jańa týǵan nárestelerdiń salmaǵy 500 gramnan aspaǵan.
— Júktiliktiń mundaı merziminde ómirlik mańyzdy aǵzalar, eń aldymen ókpe men ortalyq júıke júıesi áli tolyq qalyptasyp úlgermeıdi, bul balalardyń aman qalý múmkindigin aıtarlyqtaı tómendetti, — dep habarlady mekemeden.
Oblystyq densaýlyq saqtaý basqarmasynyń málimetinshe, qazir medıtsınalyq mekemede qyzmet kórsetý sapasyna ishki aýdıt júrgizilip jatyr.
Eske salaıyq, Astanada qonaqúıdiń káriz júıesinen shala týǵan náresteniń denesi tabyldy.
