Almaty oblysynda úsh esirtki zerthanasy joıyldy

ALMATY. KAZINFORM - Іshki ister mınıstrligi esirtki qylmysyna qarsy is-qımyl boıynsha uıymdastyrýshylyq jáne praktıkalyq sharalar keshenin qabyldap jatyr.

Almaty oblysyndaǵy ІІO qyzmetkerleri esirtki óndirý boıynsha birden úsh jasyryn esirtki zerthanasyn joıdy, onyń ekeýi fıtolaboratorııa bolyp shyqty, – dep habarlaıdy Polisia.kz.

– Tintý sharalary barysynda paıdalanýǵa daıyn 130 kg astam esirtki tárkilendi. Esirtki zerthanasyn uıymdastyrǵany úshin tórt adam ustaldy, onyń ekeýi shetel azamattary. Atalǵan qylmystardy jasaǵany úshin múlki tárkilenip, 10 jyldan 15 jylǵa deıingi merzimge bas bostandyǵynan aıyrý túrindegi jaza kózdelgen, – dedi QR ІІM esirtki qylmysyna qarsy is-qımyl departamenti bastyǵynyń orynbasary Baqytjan Ámirhanov.

Jalpy jyl basynan beri 4 esirtki zerthanasy joıyldy, 400-den astam esirtki quqyq buzýshylyǵy anyqtaldy, olardy jasaǵany úshin 160 adam ustaldy, onyń 10-y sheteldikter.