Almaty oblysynda úsh balyqshyǵa oq atqan azamat 15 jylǵa sottaldy

QONAEV. KAZINFORM – Almaty oblysynyń qylmystyq ister boıynsha mamandandyrylǵan aýdanaralyq sotynda T.-ǵa qatysty QK-niń 24-babynyń 3-bóligi (qylmysqa oqtalý) jáne 99-babynyń 2-bóliginiń 1 tarmaǵy (adam óltirý) boıynsha qylmystyq is qaraldy.

Oblystyq sot málimetine sáıkes, 2024 jyldyń 26 qazanynda T. esimdi azamat Qonaev–Baqanas avtojolynyń 26-shaqyrymynda ornalasqan «Sh» sharýa qojalyǵy aýmaǵynda spırttik ishimdik iship, shamamen 22:00-de Іle ózeniniń jaǵasyna barǵan. Sol jerde balyq aýlap otyrǵan Ý., D. jáne K.-ny kórip, olardyń baǵytyna myltyqtan birneshe ret oq atqan.

Nátıjesinde jábirlenýshiler ártúrli dárejedegi jaraqattar alǵan. Alaıda medıtsınalyq kómektiń arqasynda olar aman qalǵan.

- Sot T-nyń is-áreketterin QK-niń 24-babynyń 3-bóligi men 99-babynyń 2-bóligi 1 tarmaǵyna sáıkes saralap, qylmysty alkogoldik masań kúıde jasaýyn jaýaptylyqty aýyrlatatyn jaǵdaı dep tanydy. Sot úkimimen T. 15 jyl merzimge bas bostandyǵynan aıyrý túrinde jaza taǵaıyndaldy, - dep habarlady sottan.

Úkim zańdy kúshine engen joq.

Eske salaıyq, búgin apellıatsııalyq sot «Dıkıı Armannyń» úkimin ózgerissiz qaldyrdy.