Almaty oblysynda úsh aýysymdy mektepter máselesi qalaı sheshiledi

QONAEV. KAZINFORM — Sońǵy úsh jylda Almaty oblysynda úsh aýysymda bilim beretin mektepter sany 52-den 28-ge deıin qysqardy. Bul týraly oblys ákimi Marat Sultanǵazıev aıtyp berdi.

Almaty oblysynyń ákimi Marat Sultanǵazıev Ortalyq kommýnıkatsııalar qyzmetindegi brıfıngide bilim, densaýlyq saqtaý jáne mádenıet salalarynda atqarylǵan jumystar týraly málimet berdi.

Ákimniń aıtýynsha, 2022 jyldan beri 45 jańa mektep jáne 6 japsarjaı salyndy, sondaı-aq 55 mektep kúrdeli jóndeýden ótti. Onyń on biri ınvestorlar esebinen, al jıyrmasy «Keleshek mektepteri» jobasy aıasynda salynǵan.

— Jyl sońyna deıin taǵy alty mektep ashý josparlanyp otyr. Bilim nysandarynyń kóbeıýi úsh aýysymda oqytatyn mektepter sanyn aıtarlyqtaı qysqartqan. Mektep ınfraqurylymyn keńeıtý nátıjesinde keıingi úsh jylda úsh aýysymda bilim beretin mektepterdiń sany 52-den 28-ge deıin qysqardy. Qalǵan 28 mektepti bir mezgilde bastap salý úshin otandyq jáne sheteldik ınvestorlady EPC mehanızmi boıynsha kelissózderge shaqyramyn, — dedi Marat Sultanǵazıev Ortalyq kommmýnıkatsııalar qyzmetinde ótken brıfıngide.

Óńir ákimi densaýlyq saqtaý jáne mádenıet ınfraqurylymynyń da damyp jatqanyn atap ótti.

– Oblysta 356 medıtsınalyq nysan bar, olardyń 54% tozǵan. 2022-2025 jyldary 55 nysanǵa qurylys jumysy júrgizildi, 6 mlrd teńgege 153 medıtsınalyq jabdyq satyp alyndy. Máselen, 300 shaqyrym qashyqtyqta ornalasqan Narynqol aýylynyń turǵyndary Almatyǵa nemese oblys ortalyǵyna kelmesten tolyq medıtsınalyq qyzmet ala alady, – dedi oblys ákimi.

Sonymen birge, oblysta 7 mádenıet úıi, 6 sport kesheni, memlekettik arhıv jáne óner mektebi salyndy.

Buǵan deıin ákim Almaty oblysynyń ekonomıkasy 6 trln teńgege deıin óskenin aıtqan edi.

Jyl basynan beri Almaty oblysyna 2,2 mln týrıst keldi. Olar Kólsaı, Qaıyńdy, Qapshaǵaı oryndaryna barǵan.

Sondaı-aq, «Pepsi Co» kompanııasy Narynqol kartobynan daıyn ónimder shyǵarady.