Almaty oblysynda úsh aýysymdy mektepter eki jylda joıylady – óńir basshysy

Almaty oblysyndaǵy úsh aýysymdy mektepter megapolıs mańynda jıi kezdesedi. Bul máseleni sheshý úshin jańa ǵımarattar salynyp, eski mektepter keńeıtilip jatyr. Bul týraly Almaty oblysynyń ákimi Marat Sultanǵazıev «Jibek Joly» telearnasyndaǵy «Ýáde» baǵdarlamasynda aıtty, dep habarlaıdy Kazinform.

Baǵdarlama júrgizýshisi Erbolat Muhamedjan Almaty oblysy úsh aýysymdy mektep boıynsha kósh bastap turǵanyn aıtty. Al, Almaty oblysynyń ákimi megapolıs aınalasynda úsh aýysymdy mektepter azaıǵanyn tilge tıek etti. 

«Taldap qarasaq, úsh aýysymdy mektepter 4 aýdanymyzda jıi baıqalady, olardyń tórteýi de Almaty qalasynyń tóńireginde ornalasqan. Adamdar kóptep sol aýdandarǵa aǵylady. Al shalǵaı aýdandarda kerisinshe bir aýysymdy ǵana mektepter, keıde bala sany jetispeıtin mektepter bolady. Megapolıs aınalasynda byltyr úsh aýysymdy 53 mektep bolsa, qazir 44-ke azaıdy. Biz 8 jańa mektep saldyq, keı mektepterdi jóndeýden ótkizip, keńeıttik. «Jaıly mektep» jobasy aıasynda taǵy 53 mektep salamyz jáne demeýshiler esebinen eki bilim oshaǵy salynýda. Osylaısha, úsh aýysymdy mektep máselesin biraz jylǵa toqtatamyz. Árıne, mekteptiń jaǵdaıyn durystamaı, oqý sapasyn jaqsartý óte qıyn», - deıdi óńir basshysy. 

Óz kezeginde Marat Sultanǵazıev oblystaǵy mektep tapshylyǵy máselesi 2025 jyldyń aıaǵynda tolyq sheshiledi dep ýáde berdi. 

«Byltyr jańadan kelgenimde «Eń úzdik 100 mektep» tizimine Almaty oblysynyń birde-bir mektebi enbegen. Bıyl sol boıynsha jumys bastadyq. Kóktemde Bilim-Innovatsııa lıtseılerimen birlesken jumysty bastadyq. Olar bizdiń muǵalimderdi arnaıy oqytýdan ótkizdi. Sonyń arqasynda qazir bizdiń balalarymyz matematıka syndy respýblıkalyq olımpıadalarda júldeler alyp júr», - dedi ol.

Aıta keteıik, Almaty oblysynda mektep jasyndaǵy balalar sany jyl saıyn 13 myńǵa kóbeıedi. Óńirde halyq sanynyń artýyna baılanysty baspana salý kórsetkishi de artyp keledi.