Almaty oblysynda ultarazdyqty qozdyrǵan áıelge sot úkimi shyqty
QONAEV. KAZINFORM - Almaty oblysy Uıǵyr aýdanynyń aýdandyq sotynda azamat M.-ǵa qatysty ulttyq arazdyqty qozdyrǵany úshin (QK 174-babynyń 1-bóligi) qylmystyq is qaraldy.
Almaty oblysy sotynyń baspasóz qyzmeti habarlaǵandaı, ótken jyldyń 6 qarasha kúni saǵat 19:00 shamasynda M. azamattardyń ulttyq ar-namysy men qadir-qasıetin qorlaýǵa baǵyttalǵan aýdıojazbany What'sApp messendjerinde kórshileriniń ártúrli ult azamattary bar chatyna jibergen.
Atalǵan aýdıojazba qoǵamdyq tártipti buzyp, Uıǵyr aýdanynyń turǵyndary arasynda narazylyq týdyrǵan.
«Prokýror M.-ǵa bas bostandyǵyn shekteý túrindegi jaza taǵaıyndaýdy surady. M. kinásin moıyndady, shyn nıetpen ókinip, sottan bas bostandyǵynan aıyrýǵa baılanysty emes jaza taǵaıyndaýdy surady. Sottalýshynyń kinási qylmystyq is materıaldarymen dáleldenip, rastalǵan, atap aıtqanda, sottalýshynyń aıǵaqtarymen, kýágerlerdiń jaýaptarymen, zattardy tekserý hattamasymen, saraptama qorytyndysymen jáne basqa da obektıvti dáleldemelermen óz dálelin tapqan», - dep habarlady Almaty oblysy sotynyń baspasóz qyzmeti.
QK-niń 174-babynyń 1-bóliginiń sanktsııasy eki myńnan jeti myńǵa deıingi aılyq eseptik kórsetkish mólsherindegi aıyppul salý, eki jyldan jeti jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý túrindegi jazany kózdeıdi.
Sot jeńildetetin jaǵdaı retinde shyn nıetpen ókinýin, aýyrlatatyn jaǵdaılardyń bolmaýyn, zeınetkerlik jasyn, densaýlyq jaǵdaıyn eskere otyryp, sottalýshyny túzetý onyń qoǵamnan oqshaýlanbaı-aq qol jetkizýge bolady dep sanady.
«Sot úkimimen M. kináli dep tanyldy jáne oǵan QK 44-babynyń 2-bóliminde kózdelgen mindetterdi oryndaı otyryp, 3 jyl 6 aıǵa bas bostandyǵyn shekteý túrindegi jaza taǵaıyndaldy. Úkim zańdy kúshine engen joq», - delinedi sottyń habarlamasynda.
