Uly dala dámi: Almaty oblysynda Qydyr Ata men Baq-bala qorjyn úlestirdi
ASTANA. KAZINFORM - Almaty oblystyq №1 balalar úıine Qydyr ata nemeresimen birge atpen bardy. Balalarǵa Naýryz batasyn berip, «Tartý» qorjyndaryn úlestirdi. Balalar kelýshilerge óz ónerlerin kórsetti.
«Uly dala dámi» ulttyq jobasynyń negizgi maqsaty – Áz-Naýryzdy, ásirese balalar asyǵa kútetin basty merekege aınaldyrý. Ulystyń uly kúnin aıryqsha atap ótýde jańa qundylyqtar men dástúr qalyptastyrýǵa óz úlesimizdi qosqymyz keledi», - deıdi joba bastamashysy «Alatau Aqparat» medıaholdınginiń bas dırektory Erjan Qalymbaıuly.
Etnograf Bolat Bopaıulynyń sózinshe, Naýryzdy jańasha dáripteýde balalarǵa erekshe kóńil bólinýi kerek. Qydyr atanyń nemeresimen júrýi urpaqtar sabaqtastyǵy men ulttyq tárbıeniń mánin kórsetedi. Qazaq uǵymynda atasy ul nemerelerin, al ájeler qyz nemerelerin tárbıelegen. Sondyqtan Qydyr Ata men Baq-balany Naýryzdyń balalar asyǵa kútetin basty keıipkerlerine aınaldyrý kerek.
Ulttyq naqyshta bezendirilip kıiz úı pishininde tigilgen balalarǵa arnalǵan «Tartý» qorjyndarynyń ishine Qazaqstannyń ár óńirinen jetkizilgen dámder salynǵan. Olardyń sany jeteý: shubat, qymyz, qurt, irimshik, jent, baýyrsaq, talqan, sondaı-aq rýhanı azyq – kitap pen Almatynyń almasy, Altaıdyń baly, ulttyq kádesyılar men oıynshyqtar bar. Kitaptardyń syılyq quramynda bolýy – jastardy bilim-ǵylymǵa shaqyrady. Tabıǵı ári túrli dárýmenge baı ulttyq taǵamdar balalardy salaýatty tamaqtanýǵa daǵdylandyrý úshin salynǵan. Sondaı-aq, joba ulttyq taǵam túrleri men qolóner buıymdaryn nasıhattaıdy, bul bir jaǵynan sala kásipkerlerin qoldaýǵa jaqsy múmkindik.
Naýryzda jastar úlkenderge arnaıy baryp sálem berip, qurmet kórsetip batasyn alǵan. Ulttyq jobany uıymdastyrýshylar da Asanáli Áshimov, Asyly Osman, Tóregeldi Sharmanov pen Qarlyǵash Ábdikárimova syndy el aǵalaryna, qoǵam qaıratkerlerine sondaı-aq qarapaıym eńbek adamdaryna da sálem bere bardy. Olarǵa Naýryz qorjyny tartý etilip, qurmet kórsetilip, ıyqtaryna shapan jabyldy.
Úlkenderge berilgen «Sybaǵa» qorjynyna jeti dámnen bólek jyly-jumsaq: súrlengen qazy-qarta, jal-jaıa men jambas salynǵan.
Naýryz qorjyny berilgender arasynda qarapaıym kóshe sypyrýshy, «Altyn alqa» ıegeri men erekshe balany jalǵyz tárbıelep otyrǵan ana da bar.
Uıymdastyrýshylar «Uly dala dámi» ulttyq jobasyn aldaǵy jyldary 14 naýryzdan bastap aıdyń sońyna deıin tutas respýblıka kóleminde ótkizýdi josparlap otyr.
