Almaty oblysynda turǵyndar shaǵymnan keıin aýdan ákimi sógis aldy
QONAEV. KAZINFORM – Almaty oblysyndaǵy birneshe aýylda jaryq pen sý joq.
Almaty oblysy Qarasaı aýdanyndaǵy birneshe aýylda jaryq pen sý óshirilgen. Bul jaǵdaıǵa narazy bolǵan turǵyndar jınalyp áleýmettik jelide beıneúndeý jasady.
Olardyń aıtýynsha, kommýnaldyq tólemdi jınaıtyn kompanııanyń bereshegi jınalyp qalǵan. Sonyń saldary aýyl azamattaryna tıip otyr. Biraq turǵyndar bul kompanııaǵa óz úıleri úshin tólemdi esh keshiktirýsiz tólep júrgenderin atap ótti.
Atalǵan jaǵdaıǵa baılanysty Almaty oblysynyń ákimi Marat Sultanǵazıev áleýmettik jelidegi paraqshasynda túsinikteme berdi.
Aıtýynsha, Qarasaı aýdanyndaǵy birqatar eldi meken men saıajaı alqaptarynda elektr energııasynyń sónýi men sýmen jabdyqtaýǵa qatysty turǵyndardyń ótinishterinen habardar. Ol osy máselege baılanysty aýdan ákimdigi, energetıka basqarmasy jáne jaryqqa jaýapty mekemelerdiń basshylarymen shuǵyl jınalys ótkizgenin atap ótti.
- Mendegi málimet boıynsha, jaryqtyń óshirilýine jekelegen kompanııalardyń jaýapsyzdyǵy sebep bolǵan. Atap aıtqanda turǵyndardan elektr energııasy úshin aqsha jınaıtyn «BeyAzh Trans» seriktestigi «Alataý Jaryq Kompanııasyna» qaryz bolyp qalǵan. Bereshekti óteý boıynsha birneshe ret eskertý jiberilgenimen, qordalanǵan qaryz jabylmaǵan. Sol sebepti jaryqqa jaýapty kompanııa elektr energııasyn berýdi toqtatqan. Bul jerde qarapaıym halyqtyń esh kinási joq. Turǵyndar bireýdiń qaryzy úshin zardap shekpeýi kerek. Bul meniń naqty ustanymym, - dep jazdy ákim.
Sondaı-aq Marat Sultanǵazıev ákimdik jaýapkershilikti óz moınynan ysyryp tastamaıtynyn aıtty.
Onyń sózinshe, jumysty uıymdastyra almaǵany jáne halyqty jaryqsyz qaldyrǵany úshin Qarasaı aýdany ákimine sógis jarııalanyp, ózge de jaýapty tulǵalardy jaýapqa tartý máselesi qaralyp jatyr. Odan bólek jaýapty organdarǵa bereshektiń týyndaý sebepterin jan-jaqty zerdelep, ony sheshýdiń naqty joldaryn usynýdy tapsyrylǵan.
- Máseleni ýaqytsha emes, júıeli túrde sheshý qajet. Elektr energııasyn esepke alý júıesin jetildirý, derbes esepshottarǵa kóshý jáne ınfraqurylymdy basqarýdy retteý baǵytynda naqty sharalar qabyldanatyn bolady, - dedi ol.
Sondaı-aq oblys ákimi jaǵdaı jeke baqylaýynda ekenin atap ótti.
Eske salaıyq, keshe Almaty zoobaǵynda birneshe nysan janyp ketti.
