Almaty oblysynda turǵan eski avtobýstardyń bir toby aýktsıonda satyldy
QONAEV. KAZINFORM – Almaty oblysynda isten shyqqan avtobýstardyń bir toby satyldy.
Saýda-sattyqty e-Qazyna portaly arqyly Іle aýdanynyń ekonomıka jáne qarjy bólimi júzege asyryp jatyr. Baǵalaý esebine sáıkes, 29 avtobýs Іle aýdandyq turǵyn úı-kommýnaldyq sharýashylyq jáne turǵyn úı ınspektsııasy bóliminiń menshiginde bolǵan. Tizimge Golden Dragon jáne Yutong sııaqty jeti markaly avtobýstar kirdi.
E-Qazyna portalyndaǵy lottardyń aqparatyna sáıkes, barlyq avtobýstardyń tehnıkalyq jaǵdaıy nashar jáne jaramsyz dep tanylǵan. Olardyń arasynda 2016–2018 jyldary shyǵarylǵan GAZ, LIAZ jáne PAZ markaly avtobýstary da bar. Esepten shyqqan kólikter Alataý qalasynyń Jetigen shaǵynaýdanynda ornalasqan.
Jalpy bıyl qyrkúıek aıynan beri aqaýy bar 16 avtobýs satylǵan. Olardyń bastapqy baǵasy shamamen 6,56 mln teńge bolsa, saýda qorytyndysy boıynsha kólikter 5,49 mln teńgege satyldy.
Eń arzan lot – 2018 jyly shyǵarylǵan LIAZ-529265 avtobýsy boldy. Bastapqy baǵasy 765,7 myń teńge jáne baǵalaý quny 255,2 myń teńge bolǵanymen, ol 50,5 myń teńgege satyldy.
Baǵasyn tómendetý arqyly saýdaǵa shyǵarylǵan basqa avtobýstar 35,6–51,4 myń teńge aralyǵynda ótken. Al GAZ markaly avtobýstarynyń saýdasy baǵany kóterý aýktsıondary arqyly ótti. Mysaly, bastapqy baǵasy 61,8 myń teńge bolǵan solardyń biri 1,08 mln teńgege satyldy.
Eske salaıyq, byltyr Almaty ákimdigi eski avtobýstardy 160 mıllıon teńgege satty.
