Almaty oblysynda transulttyq esirtki tobynyń 7 múshesi sottaldy
ALMATY. KAZINFORM – Almaty oblysynyń qylmystyq ister jónindegi mamandandyrylǵan aýdanaralyq soty sıntetıkalyq esirtki zattaryn óndirýmen jáne ótkizýmen aınalysqan transulttyq uıymdasqan qylmystyq top quramyndaǵy 7 shetel azamatyna qatysty úkim shyǵardy.
Oblys prokýratýrasynyń ýılestirýimen polıtsııa qyzmetkerleri 3 jasyryn esirtki zerthanasyn anyqtady. Tintý barysynda zańsyz aınalymnan 90 kg astam daıyn sıntetıkalyq psıhotroptyq zattar, 1 tonnadan astam prekýrsorlar men hımııalyq komponentter, sondaı-aq olardy daıyndaýǵa arnalǵan qural-jabdyqtar tárkilendi.
Mamandardyń baǵalaýynsha, tárkilengen zattardyń «qara naryqtaǵy» quny 1,5 mlrd teńgeden asady.
Sotta memlekettik aıyptaýshy sottalýshylardyń kinásin tolyq dáleldeıtin bultartpas aıǵaqtardy usyndy. Qylmystyq is qujattaryn jan-jaqty zertteý nátıjesinde sot olarǵa 19 jyldan 20 jylǵa deıingi bas bostandyǵynan aıyrý jazasyn taǵaıyndady.
Sonymen qatar sottalǵandarǵa tıesili 3 turǵyn úı men avtokólikter memleket kirisine tárkilendi.
Almaty qalasy men Almaty oblysynyń aýmaǵynda esirtki quraldarynyń keń kólemde taralýyna jáne qoǵamdyq qaýipsizdikke eleýli qater tóndirgen uıymdasqan jeliniń qyzmeti toqtatyldy.
Sot úkimi zańdy kúshine engen joq.
Aıta keteıik, osyǵan deıin Qaraǵandyda asyrap alǵan balalardy azaptady degen qamqorshylarǵa sot úkimi shyqqanyn jazǵan edik.
