Almaty oblysynda tórt adamnyń ómirin qıǵan apattan eki bala zardap shekti

QONAEV. KAZINFORM – Almaty-Shelek-Qorǵas tas jolyndaǵy apattan zardap shekken 3 adamnyń jaǵdaıy belgili boldy.

Almaty oblystyq densaýlyq saqtaý basqarmasynyń málimetinshe, 12 maýsym túngi saǵat 00:30 - 01:00 shamasynda Tótenshe jaǵdaılar mınıstrligi men 103 jedel járdem brıgadasy Shelek aýrýhanasyna jol apatynan zardap shekken 34 jastaǵy er adamdy jáne 10-12 jastaǵy eki balany jetkizdi. 

«Naýqastardy dárigerler qarap, shuǵyl hırýrgııalyq bólimshege jatqyzdy. Qazirgi ýaqytta úsheýiniń de jaǵdaıy turaqtandy. Olar dárigerlerdiń baqylaýynda. Qajet em-domdy tolyq kólemde alyp jatyr», - dep habarlady Almaty oblystyq densaýlyq saqtaý basqarmasynan. 

Buǵan deıin Almaty-Qorǵas tas jolynda shaǵyn avtobýs aýdarylyp, saldarynan 4 adam qaza tapqany týraly jazǵan edik.