Almaty oblysynda tegin 10 sotyq jerge qansha adam kezekte tur

ALMATY. KAZINFORM — Almaty oblysynda keıingi úsh jylda óńir turǵyndaryna 1002 jer telimi berilgen. 

Bul týraly Kazinform saýalyna jaýap bergen Almaty oblysynyń jer qatynastary basqarmasy málimdedi.

— Búgingi kúnge deıin Almaty oblysynda jeke turǵyn úı qurylysyna arnalǵan jer telimin alýǵa kezekte 1 309 052 azamat tirkelgen. Keıingi úsh jylda oblys turǵyndaryna 1002 jer telimi berildi. Jer telimderi Jer kodeksi men «Turǵyn úı qatynastary týraly» zań talaptaryna sáıkes kezek tártibimen beriledi, — delingen jaýapta.

Qazirgi ýaqytta jeke turǵyn úı qurylysyna arnalǵan jer telimin berý boıynsha buryn berilgen ótinishterdi óńdeý jumysy júrip jatyr. Kezek ótinishterdiń qabyldanǵan kúnine qaraı zańda belgilengen tártippen jyljıdy.

Oblysta búgingi kúni jeke turǵyn úı qurylysyna jaramdy jańa aýmaqtardy daıyndaý jumysy júrip jatyr. Atap aıtqanda: avtojoldar salý, elektr jelilerin tartý, sýmen jabdyqtaý jáne gazben qamtý, sondaı-aq qala mańy jáne jańa turǵyn aýdandardy damytý.

— Jańa jer telimderin paıdalanýǵa jaramdy etý úshin ınfraqurylym qurý qajet. Aýyldyq jáne qalalyq ákimdikter qala mańy men jańa turǵyn aýdandardyń ınfraqurylymyn damytý baǵytynda jumys istep jatyr, — delingen basqarma jaýabynda.

Kezektegi oryndy biryńǵaı memlekettik jyljymaıtyn múlik kadastry portalyndaǵy «Jer telimin alýshylardyń tizimi» bóliminen kórýge bolady.

Eske salaıyq, buǵan deıin Almatyda tegin 10 sotyq jer berý toqtatylǵanyn jazǵanbyz.