Almaty oblysynda tegin 10 sotyq jer ýchaskesi berilip jatyr ma
ASTANA. KAZINFORM – Almaty oblysy ákimdigi tegin 10 sotyq jer ýchaskeleriniń beriletini týraly taralǵan aqparat jalǵan ekenin habarlady.
Áleýmettik jelide kezekte turǵan azamattarǵa saıajaı ýchaskeleriniń ornynan jer beriletini týraly aqparat tarady. Almaty oblysy ákimdigi bul habarlandyrýǵa qatysty túsinik berdi.
— Tegin 10 sotyq jer ýchaskeleriniń beriletini týraly taralǵan aqparat qate ekenin habarlaımyz, — delingen habarlamada.
Qazirgi tańda baqsha massıvterin eldi mekenderdiń jerlerine aýystyrý jumystary júrgizilip jatyr, olardyń maqsatty taǵaıyndalýyn JTQ nemese jeke sharýashylyq jerleri (JShJ) retinde ózgertý josparlanyp otyr. 2025 jyly jalpy aýdany 123 ga bolatyn 23 baqsha massıvin qosý josparlanyp otyr.
Integratsııadan keıin bos jer ýchaskeleri paıda bolǵan jaǵdaıda, olar kezekke sáıkes beriledi.
— 2025 jylǵa jeke turǵyn úı qurylysyna (JTQ) arnalǵan tegin 10 sotyq jer alý kezeginde shamamen 1 284 488 adam bar. 2024 jylǵy málimetter boıynsha, bıyl JTQ úshin jer ýchaskelerin berý josparlanbaǵan, sebebi kezekshilerge berý úshin daıyn bos jer ýchaskeleri joq. 2023 jyly óńirde 4 300 jer ýchaskesi berilgen, bul kezekke turǵandardyń jalpy sanynyń 0,4%-nan az. Jer ýchaskelerin berý protsesi alańdar daıyn bolǵan jáne bos jerler paıda bolǵan saıyn júzege asyrylady, bul shekteýli resýrstar men ınfraqurylymmen qamtamasyz etý qajettiligine baılanysty, — delingen habarlamada.
Aıta ketelik jer ýchaskesin jalǵa alý merzimin uzartý erejesi ózgertildi.