Almaty oblysynda taýyp alǵan qarýlardy zańsyz saqtaǵan azamat jazalandy

QONAEV. KAZINFORM - Almaty oblysy Raıymbek aýdandyq sotynda atys qarýlardy, oq-dárilerdi zańsyz ıemdendi, saqtady, tasymaldady degen aıyppen (QK-niń 287-baby 3-bóligi boıynsha) kúdiktige qatysty qylmystyq is qaraldy.

Almaty oblystyq sotynyń málimetine sáıkes, 2024 jyldyń 5 shildesinde aıyptalýshy atqa otyryp Almaty oblysy Raıymbek aýdany, Jambyl aýyldyq okrýgine qarasty «Aqqól» jaılaýynda mal jaıyp júrgen kezinde, inniń aýzynan shyǵyp turǵan aq tústi qapty kórgen.

Qaptyń ishinde eshbir qujatsyz «VEPRЬ-308» jáne «TOZ-8» markaly qarýlaryn, 308 win kalıbrli jáne 5,6 kalıbrli qarýlardyń oq-dárilerin taýyp alǵan.

- Sottalýshy qapty ishindegi zattarymen óz atyna júktep, ózimen birge Qaratoǵan aýylyna aparyp, óz turǵyn úıinde zańsyz saqtaǵan. Sottalýshynyń kinási is-materıaldarmen: kýálardyń aıǵaqtarymen jáne sotta rastalǵan basqa da dáleldemelermen tolyq dáleldengen. Sot sottalýshynyń ózine taǵylǵan is-áreketterdi jasaǵany úshin kináli dep tanyp, oǵan 2 jyl merzimge bas bostandyǵyn shekteý jazasyn taǵaıyndady, - dep habarlady sot Úkim zańdy kúshine enbedi.

Eske salaıyq, buǵan deıin Almatyda áıelin pyshaqtap óltirgen kúdikti 15 jylǵa sottalǵanyn jazǵanbyz.