Almaty oblysynda taýdan ózdiginen túse almaǵan eki jasóspirim qutqaryldy
ASTANA. KAZINFORM — Almaty oblysynyń Qarasaı aýdanynda qutqarýshylar taýda qalyp qoıǵan eki jasóspirimge kómekke keldi, dep habarlaıdy TJM baspasóz qyzmeti.
Oqıǵa túnde «Terra» alańy mańynda, teńiz deńgeıinen 2600 metr bıiktikte bolǵan.
Almaty qalasynyń Monıtorıng jáne jedel áreket etý ortalyǵynyń qutqarýshylary taýdan ózdiginen túse almaǵan jasóspirimderge kómekke kelgen.
— Qutqarýshylar olarmen baılanysta bolyp, ornalasqan jerin anyqtady. Keıin jasóspirimderdi qaýipsiz jerge túsirip, týystaryna tapsyrdy. Jasóspirimderge medıtsınalyq kómek qajet bolmaǵan, — delingen habarlamada.
Eske salsaq, Almatyda shatqalda adasqan oqýshylardy tikushaqpen izdeýge týra kelgenin jazǵanbyz.
