Almaty oblysynda taý shyńyndaǵy máıit tikushaqpen túsiriletin boldy
QONAEV. KAZINFORM — Almaty oblysyndaǵy Severtsov muzdyǵy mańynan týrıster toby adam máıitin tapqan bolatyn.
TJD «QazÁýeQutqarý» mekemesine qarasty tikushaq Apattar medıtsınasy ortalyǵynyń mamandarymen jáne «Barys» respýblıkalyq shuǵyl qutqarý jasaǵynyń qutqarýshylarymen birge teńiz deńgeıinen 4 300 metrge jýyq bıiktikte ornalasqan Severtsov muzdyǵynan máıitti tómen túsirý úshin ushyp shyqqanyn málimdedi.
— Máıit tómenge túsirilgennen keıin Almaty oblysynyń Polıtsııa departamentiniń qyzmetkerlerine tapsyrylady. Bul jumystardy oryndaýǵa ornalasqan jerdiń bıiktigi, aýmaqtyń qatynaýǵa qıyndyǵy, taýly jerdiń kúrdeliligi, tik betkeıler men aýa raıy jaǵdaılary keri áserin tıgizip, qıyndatyp otyr, — dep túsindirdi departamentten.
Eske salaıyq, áleýmettik jeli qoldanýshysynyń aıtýynsha, 16 tamyzda Belarýs Respýblıkasynan kelgen týrıster taýda adam qaldyqtaryn anyqtaǵan. Bul jaıly qutqarý qyzmetine aqparat berilse de, adam máıitin evakýatsııalaý máselesi sheshilmeı kelgen.
