«Hýtorskıe» toby: atyshýly Hasan Qasymbaev ustaldy

QONAEV. KAZINFORM - Almaty oblysynyń polıtsııasy Hasan Qasymbaevty qamaýǵa aldy. Buǵan deıin 16 jastaǵy Sherzat Polattyń óliminen keıin talǵarlyqtar ony «Hýtorskıe» tobynyń basshy bolýy múmkin ekenin aıtqan bolatyn.

Almaty oblysy Polıtsııa departamentiniń málimetine sáıkes, bıyl 2 qarasha kúni H.Qasymbaev 2021 jyly maýsymda A. atty azamatty urlap, densaýlyǵyna qasaqana aýyr zııan keltirdi degen kúdikpen ustaldy jáne ýaqytsha ustaý ızolıatoryna qamaldy.

- Qazirgi ýaqytta qylmystardyń barlyq jaǵdaılaryn jan-jaqty, tolyq jáne obektıvti zertteýdi qamtamasyz etý úshin tergeý áreketteri júrgizilip jatyr. Іs materıaldary bultartpaý sharasyn sanktsııalaý úshin sotqa jiberildi. Tergeý oblystyq polıtsııa departamenti basshylyǵynyń baqylaýynda. Tergeý múddesi úshin ózge de aqparat jarııalaýǵa jatpaıdy, - dep habarlady oblystyq Polıtsııa departamentiniń baspasóz qyzmeti.

Eske salaıyq, áleýmettik jelide Hasan Qasymbaev qylmystyq toptyń jetekshisi bolýy múmkin ekeni týraly aqparat taraǵannan keıin ol beıneúndeý jarııalaǵan bolatyn. Onda Qasymbaev eshqandaı qylmystyq topqa qatysy joq ekenin aıtty.

Buǵan deıin 4 qazan kúni Talǵar qalasyndaǵy tóbelesten 16 jastaǵy Sherzat Polat kóz jumǵanyn  jazǵanbyz. 

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy. 

12 qazan túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵaldy. 

Іshki ister mınıstrliginiń ókilderi BAQ qyzmetkerlerine Sherzat Polat qaza tapqan jerde kameraǵa túsip qalǵan vıdeony kórsetti.