Almaty oblysynda taǵy bir sý qoımasy memleketke qaıtaryldy

QONAEV. KAZINFORM – 2017 jyly Almaty oblysynda senimgerlik basqarýǵa berilgen sý qoımasy memleket menshigine qaıtarylady.

QR Joǵarǵy sotynyń málimetinshe, 2017 jyly «Voroshılovskoe» sý qoımasy 49 jylǵa satyp alý quqyǵynsyz senimgerlik basqarýǵa jeke kásipkerge berilgen. Biraq 2021 jyly kásipker qaıtys bolǵannan keıin sý qoımasyn basqarý quqyǵy qosymsha kelisim negizinde murager retinde onyń jesirine ótken.

Alaıda senimgerlik basqarý kelisimi men bıznes-jospar talaptarynyń nashar oryndalýy, tıisti baqylaýdyń bolmaýy jáne tıimsiz basqarý saldarynan 2024 jyly sý qoımasynyń bas bógeti jarylyp, memleket menshigine edáýir shyǵyn ákeldi.

Sondaı-aq sý qoımasynyń murageri Qarjy basqarmasynyń birneshe ret shaǵymdaryna durys jaýap bermegendikten, basqarma sotqa talap aryzben júginip, sý qoımasyn kommýnaldyq menshikke qaıtarýdy talap etken.

Almaty oblysynyń mamandandyrylǵan aýdanaralyq ekonomıkalyq soty isti qarap, senimgerlikpen basqarýshynyń qaıtys bolýy onymen jasalǵan senimgerlik basqarý shartyn buzýǵa negiz bolyp tabylatynyna kelisti.

- Notarıýstyń muragerlerge múliktik emes quqyqtardy sý qoımasyna berý jónindegi notarıattyq áreketter jasaýǵa quqyǵy joq, óıtkeni olarda mundaı quqyqtar bolmaǵan, - dep habarlady QR Joǵarǵy soty.

Osylaısha sotqa jiberilgen talap ishinara qanaǵattandyrylyp, sheshim qabyldandy.

- 2017 jylǵy senimgerlikpen basqarý sharty jeke kásipkerdiń qaıtys bolýyna baılanysty buzyldy. 2021 jylǵy qosymsha kelisim jaramsyz dep tanyldy. Sý qoımasyna qatysty áıelge berilgen muragerlik quqyǵy týraly kýálik jaramsyz dep tanyldy. Sot áıelge sý qoımasyn kommýnaldyq menshikke qaıtarýdy mindettedi. Osylaısha, memlekettik menshikke quqyqtardy zańsyz berý bóliginde memlekettiń zańdy múddeleri qalpyna keltirildi, - dep habarlady Joǵarǵy sot.

Sheshim zańdy kúshine endi.

Eske salaıyq, buǵan deıin Almaty oblysynda memleketke qaıtarylǵan sý qoımalary qaıtadan senimgerlik basqarýǵa beriletinin jazǵanbyz.