Almaty oblysynda taǵy bir bala zorlyqqa ushyraǵany anyqtaldy

Almaty oblysynyń polıtseıleri kámeletke tolmaǵan búldirshinge qatysty zorlyq-zombylyq jasady degen kúdiktini anyqtap, ustady, dep habarlaıdy Kazinform.

Almaty oblystyq Polıtsııa departamentiniń bastyǵy Baýyrjan Álenovtyń sózinshe, birinshi qarasha kúni Jambyl aýdanynyń polıtsııasyna Aqseńgir aýylynyń 44 jastaǵy jergilikti turǵynynan qazan aıynda belgisiz er adamnyń qyzyna qatysty jynystyq sıpattaǵy is-áreketter jasaǵany týraly aryz túsken.

«Atalǵan derek QR QK 121-babynyń 4-bóligi boıynsha aýdandyq polıtsııada dereý tirkeldi. Jedel-izdestirý is-sharasy barysynda polıtsııa qyzmetkerleri 1974 jylǵy K. esimdi kúdikti azamatty anyqtap, ustady. Sottyń sanktsııasymen ustalǵan adam sotqa deıingi tergeý júrgizý kezinde eki aı merzimge qamaýǵa alyndy»,- deıdi oblystyń bas polıtseıi.

Aıtýynsha, qazirgi ýaqytta qylmysty tergeýde onyń tolyqtyǵyn, jan-jaqtylyǵyn jáne obektıvtiligin qamtamasyz etý maqsatynda saraptamalyq tekserýler taǵaıyndaldy.

Buǵan deıin Qarasaı aýdanyna qarasty Qoshmambet aýylynda 60 jastaǵy er adam 7 jastaǵy uldy zorlady degen kúdikke ilingeni týraly jazǵan bolatynbyz.