Almaty oblysynda sý únemdeıtin apparattar zaýyty ashylady
Almaty oblysynyń 4 paıyzǵa jetpeıtin jerinde ǵana sý únemdeıtin tehnologııalar qoldanylady. Endi oblysta sý únemdeý apparattaryn shyǵaratyn zaýyttar ashylmaq. Bul týraly Almaty óńiriniń ákimi Marat Sultanǵazıev «Jibek Joly» telearnasyndaǵy «Ýáde» baǵdarlamasynda aıtty, dep habarlaıdy Kazinform.
Baǵdarlamada aıtylǵandaı, aýyl sharýashlyǵynda oblystyń áleýeti joǵary. Alaıda sý tapshylyǵy kedergi keltirýde.
«Bizdiń oblysta halyqtyń 84 paıyzy aýyldarda mekendeıdi. Qalǵan 16 paıyzy ǵana qalalarda turady. Árıne, aýyl sharýashylyǵynyń damýy biz úshin ózekti másele. Óıtkeni ol aýyl turǵyndarynyń tabysy men kirisine tikeleı qatysty. Sý tapshylyǵy boıynsha bıyl 3 myń gektarǵa egindik alqaptaryn ulǵaıttyq. Biraq sý tapshylyǵy sezildi. Ol bar. Sonymen qatar saraptap qarasaq, bizdiń tek qana 4 paıyzǵa jetpeıtin jerimiz ǵana sý únemdeıtin tehnologııalardy qoldanady. Eger bul tehnologııalardy múmkindiginshe tolyq qoldansaq, sý tapshylyǵy sezilmeýshi edi», – dedi oblys basshysy.
Ákimniń aıtýynsha, sý únemdeý tehnologııalarynyń taralmaýyna eki sebep bar. Bir jaǵynan tehnologııanyń qymbat quny, ekinshi jaǵynan – turǵyndar arasynda túsindirý men aqparattandyrýdyń bolmaýy.
«Sondaı-aq tehnologııalardy taratý men qarjylandyrý máselelerin sheshý kerek. Ótkende Qytaı jaqtaǵy kórshiles oblysqa baryp keldik, olar jeriniń 90 paıyzynda jańbyrlatyp, tamshylatyp sýarý sekildi únemdeý tehnologııalaryn qoldanady eken. Keıin ózimizde tamshylandyrý, jańbyrlatý apparattaryn shyǵaratyn birneshe zaýyt ashýdy josparlap otyrmyz. Sol zaýyttar ashylsa, ári qaraı bizdiń sharýashylyqtardy baılanystyramyz. Ol búgingi kúnniń talaby bolyp otyr. Onsyz sýdyń tapshylyǵy jyldan-jylǵa sezinemiz», – dedi Marat Sultanǵazıev.
Buǵan deıin Almaty oblysynyń ákimi mektep jasyndaǵy balalar sany jyl saıyn 13 myńǵa kóbeıetinin, óńirde baspana salý kórsetkishi de artyp kele jatqanyn aıtqan edi. Sondaı-aq Almaty óńiriniń bıligi turǵyn úıdi salýdyń ornyna daıynyn satyp alý prıntsıpine kóshkeni málim etildi.
