Almaty oblysynda sý tasqyny kezeńine daıyndyq qarqyndy júrgizilip jatyr
ASTANA. KAZINFORM — Vegetatsııa jáne sý tasqyny kezeńine daıyndyq maqsatynda «Qazsýshar» RMK-nyń «D. Qonaev atyndaǵy Úlken Almaty kanaly» fılıaly óz qaraýyndaǵy sý sharýashylyǵy nysandarynda jóndeý jumystaryn júrgizdi, dep habarlaıdy Sý resýrstary jáne ırrıgatsııa mınıstrligi.
2025 jyly Bartoǵaı sý qoımasynda konýstyq ysyrmalar jóndelip, rezeńke tyǵyzdaǵyshtar aýystyryldy. Úlken Almaty kanalynyń bas torabynda jáne Shelek sý torabynda burandaly kótergishter men bolat arqandar jańartyldy. Kúrti sý qoımasynda bógettiń joǵarǵy eńisi betonmen qaptaldy. Tasqutan sý kóterý bógetinde kanaldar arasyndaǵy aýmaqtarǵa topyraq tóseldi. Sondaı-aq Bartoǵaı sý qoımasy, Úlken Almaty kanalynyń bas toraby jáne Shelek sý toraby mańyndaǵy Shelek ózeniniń arnasy tazartyldy.
Sý tasqyny kezeńine daıyndyq aıasynda bıyl Kúrti ózeniniń jaǵalaý bóligi bekitildi. Qazirgi tańda «Qoram» magıstraldyq kanalynda mehanıkalyq tazalaý jumystary júrgizilip jatyr.
Jyl sońyna deıin Bartoǵaı sý qoımasynda konýstyq ysyrmalardy jóndeý jáne rezeńke tyǵyzdaǵyshtardy aýystyrý, Shelek sý torabynda burandaly kótergishti jańartý, sondaı-aq Bartoǵaı sý qoımasy, Úlken Almaty kanalynyń bas toraby jáne Shelek sý toraby mańyndaǵy Shelek ózeniniń arnasyn tazalaý josparlanǵan.
— Qazir fılıal qaraýyndaǵy barlyq nysan shtattyq rejımde jumys istep tur. Sý sharýashylyǵy jaǵdaıyna turaqty monıtorıng júrgizilip jatyr. Sý tasqynyna qarsy is-sharalarǵa qajetti janar-jaǵarmaı jáne ınertti materıaldar qory daıyndaldy. Sonymen qatar ekskavatorlar, tıegishter jáne júk samosvaldaryn qosa alǵanda 18 tehnıka ázirlendi, — dedi «Qazsýshar» RMK-nyń «D. Qonaev atyndaǵy Úlken Almaty kanaly» fılıalynyń dırektory Qaırat Bısembaev.
Budan buryn «QazAvtoJol» UK» AQ basqarma tóraǵasy Darhan Imanashev sý tasqyny kezeńine daıyndyq sharalary týraly baıandady.