Almaty oblysynda sý qoımalary memleket menshigine qaıtaryldy: olardyń jaǵdaıy ne bolmaq

QONAEV. KAZINFORM – Almaty oblysynda 8 sý nysany memlekettik baqylaýǵa qaıtaryldy. Onyń beseýi sot arqyly, al úsheýi ózara kelisim negizinde ótti.

Oblys ákimdiginiń habarlaýynsha, mundaı sheshim 2024 jyly jeke basqarýshy kompanııalarmen jasalǵan kelisimsharttar talaptarynyń buzylýy anyqtalǵannan keıin qabyldandy.

Sot tártibimen myna nysandar qaıtaryldy:

– Esik kóli bógeti,
– Saz Talǵar 7,
– Baıserke 2,
– Voroshılovskoe,
– K 3.

Kelisim negizinde qaıtarylǵan nysandar:

– Teren Qara (joǵarǵy),
– Saz Talǵar 4,
– K30/1.

Qazir bul nysandar oblys ákimdigine qarasty Alamaty oblysy sý sharýashylyǵy memlekettik kásipornynyń basqarýyna berildi. Barlyq nysan Talǵar, Іle jáne Qarasaı aýdandarynda ornalasqan.

Sý qoımalaryn ne kútip tur?

Nysandar memlekettik menshikke ótkennen keıin, bılik olardy ýaqtyly jańǵyrtyp, jóndeý jumystaryn júrgize alady. Josparda dambalardy nyǵaıtý, sý jiberý shlıýzderin jóndeý, sý qoımalarynyń jaǵdaıyn, ásirese sý tasqyny kezeńinde, baqylaýdy kúsheıtý jáne nysandardy turaqty monıtorıngten ótkizý bar.

Sonymen qatar, sý qoımalaryn ári qaraı paıdalaný úshin jeke ınvestorlardy tartý kózdelip otyr. Mysaly, «Esik kóli bógeti» men «Teren Qara» nysandaryna 23 mlrd teńgeden astam ınvestıtsııa tartý týraly kelisim jasaldy, ol 210 jańa jumys oryn ashýǵa múmkindik beredi.

– Bizdiń basty maqsatymyz – sý resýrstaryn tıimdi paıdalaný. Nysandardy memlekettik basqarýǵa qaıtarý olardyń ýaqytyly jóndelýine jáne durys paıdalanylýyna múmkindik beredi. Al ınvestıtsııa tartý – óńirdiń damýyna, jumys oryndarynyń kóbeıýine jáne bıýdjet kirisiniń artýyna yqpal etedi,– dep atap ótti Almaty oblysy qarjy basqarmasynyń basshysy Bıbigúl Uzaqova.

Osyǵan deıin Almaty oblysynda 8 sý qoımasy memleketke qaıtarylǵany týraly jazǵan edik.