Almaty oblysynda sý basý qaýpi bar 27 eldi meken anyqtaldy

QONAEV. KAZINFORM - Almaty oblysynda kóktemgi sý tasqynyna ázirlik jumystary bastalyp ketti. Bul týraly óńirilik kommýnıkatsııalar qyzmetinde ótken baspasóz máslıhatynda TJD tótenshe jaǵdaılardyń aldyn alý basqarmasynyń bastyǵy Dáýren Azamatov aıtty.

Spıkerdiń sózinshe, Almaty oblysynda sý basý qaýpi bar 27 eldi meken bar. Onyń 7-eýinde qaýip tolyǵymen joıylyp, 20 nysanda qaýip tómendetildi.

«Aımaqtaǵy eldi mekenderden 3 myńnan astam tekshe metr qar shyǵaryldy. 154,8 shaqyrym aryq jelileri, 48,2 shaqyrym kanal, 87 birlik avtojol jáne 7 birlik temir jol astyndaǵy sý ótkizý jáne 27,2 shaqyrym sý burý kanaldary qazyldy», - dedi Dáýren Azamatov.

Sonymen qatar ol Eńbekshiqazaq, Talǵar, Kegen jáne Qarasaı aýdandarynyń 12 eldi mekeninde jergilikti jáne respýblıkalyq mańyzy bar joldardaǵy 88 sý ótkizý qubyry aýystyrylyp, 435 shaqyrym aryq-kanal júıesi qaıta jańartylǵanyn atap ótti.