Almaty oblysynda stalkıng jasaǵan er adam sottaldy
QONAEV. KAZINFORM - Almaty oblysynda er adam stalkıng jasaǵany úshin 60 saǵat qoǵamdyq jumysqa tartyldy.
Qylmystyq isti Eńbekshiqazaq aýdandyq soty qarady. Er adam Qylmystyq kodekstiń 115-1-baby «Stalkıng» boıynsha aıyptalǵan.
Sot anyqtaǵandaı, sottalýshy 2025 jyldyń kúzinen bastap áıelge birneshe ret qońyraý shalyp, WhatsApp arqyly habarlamalar jiberip, onymen qarym-qatynas ornatýǵa tyrysqan. Áıel onymen baılanys jasaýdan úzildi-kesildi bas tartqanyna qaramastan, er adam ony ańdýyn jalǵastyrǵan.
Sonyń saldarynan jábirlenýshi ózin qaýipsiz sezinýden qalyp, kúndelikti ómir saltyn ózgertýge májbúr bolǵan.
Jaza taǵaıyndaý kezinde sot sottalýshynyń kinásin moıyndap, jasaǵan isine ókingenin eskerdi. Qylmystyq jaýapkershilik pen jazany aýyrlatatyn mán-jaılar anyqtalǵan joq.
Sot er adamdy Qylmystyq kodektiń 115-1-baby boıynsha kináli dep tanyp, oǵan 60 saǵat qoǵamdyq jumys jazasyn taǵaıyndady.
Sonymen qatar odan Jábirlenýshilerge ótemaqy qoryna 5 AEK ne 21625 teńge májbúrli tólem óndirildi.
Sot úkimi zańdy kúshine endi.
Eske salaıyq, Qyzylordada stalkıng jasaǵan 4 adamǵa qatysty úkim shyqqan edi.
