Almaty oblysynda stalkerge sot úkimi shyqty
ALMATY. KAZINFORM – Almaty oblysynyń Eńbekshiqazaq aýdandyq sotynda QR Qylmystyq kodeksiniń 115-1-baby boıynsha (stalkıng) aıyptalǵan azamatqa qatysty is qaraldy.
Sotpen málimetinshe, jábirlenýshi men sottalýshynyń týystyq baılanysy bar. Jábirlenýshiniń kúıeýi sottalýshymen birge turatyn áıeldiń týǵan baýyry. Jábirlenýshiniń úıinde kámeletke tolmaǵan jıeni turady. Sottalýshy birge turatyn áıeliniń balasyn zańsyz ustap otyr dep eseptep, osyǵan baılanysty qýdalaý áreketterin jasaǵan.
- 2025 jyldyń kúzinen bastap sottalýshy jábirlenýshiniń erkine qarsy áreketter jasady. Ol «WhatsApp» messendjeri arqyly telefon qońyraýlary men habarlamalar joldaý arqyly baılanys ornatýǵa tyrysqan. Jábirlenýshiniń onymen qarym-qatynas jasaýdy qalamaǵanyna qaramastan, sottalýshy mátindik jáne daýystyq habarlamalar jiberýdi, onyń ishinde túngi ýaqytta da mazalaýdy jalǵastyrǵan. 2026 jylǵy 10-12 aqpan aralyǵynda ol birneshe ret habarlamalar jiberip, telefon qońyraýlaryn jasaǵan, olardyń bir bóligin keıinnen óshirgen, - dep habarlady Eńbekshiqazaq aýdandyq soty.
Sot zańsyz áreketterdiń saldarynan jábirlenýshi óziniń qaýipsizdigi úshin alańdap, qorqynysh sezingenin, júrip-turý erkindigin shekteýge májbúr bolǵanyn, uıqysy buzylyp, emotsıonaldyq jaǵdaıy nasharlaǵanyn atap ótti.
Nátıjesinde sot B.-ny QR Qylmystyq kodeksiniń 115-1-baby boıynsha kináli dep tanyp, oǵan 60 saǵat qoǵamdyq jumys túrinde jaza taǵaıyndady. Sonymen qatar, sottalýshydan Jábirlenýshiler qoryna 5 AEK kóleminde májbúrli tólem óndirildi. Sot úkimi zańdy kúshine endi.
Eske salaıyq, Qyzylordada stalkıng jasaǵan 4 adamǵa qatysty úkim shyqty.
