Almaty oblysynda sottalǵandardan aqsha bopsalaǵan qylmystyq top músheleri sottaldy
ALMATY. KAZINFORM – Bıyl 12 maýsymda Almaty oblysynyń qylmystyq ister jónindegi mamandandyrylǵan aýdanaralyq soty Almaty oblysy Zarechnyı kentinde ornalasqan №14 túzeý mekemesinde qylmystyq áreket uıymdastyrǵan qylmystyq toptyń 10 múshesine qatysty úkim shyǵardy.
Anyqtalǵandaı, 2022-2024 jyldar aralyǵynda atalǵan mekemede jazasyn ótep júrgen jekelegen sottalǵandar turaqty uıymdasqan qylmystyq top quryp, psıhologııalyq qysym kórsetý jáne kúsh qoldaný arqyly basqa sottalǵandarǵa qatysty zańsyz áreketter jasaǵan.
Oblystyq prokýratýra málimetinshe, uıymdasqan qylmystyq toptyń músheleri basqa sottalǵandardan júıeli túrde aqsha bopsalap otyrǵan. Alynǵan qarajat bank kartalaryna jáne Kaspi men basqa da mobıldi qosymshalardaǵy ózderiniń baqylaýyndaǵy shottarǵa aýdarylǵan. Talaptaryn oryndaýdan bas tartqan jábirlenýshiler uryp-soǵýǵa, qorlaýǵa jáne ózge de dene kúshin qoldaný túrlerine ushyraǵan.
Atalǵan kópepızodty qylmystyq is boıynsha tergep-tekserýdi Almaty oblysy prokýratýrasynyń arnaıy prokýrorlary QR QK-niń 262, 194 jáne 190-baptary boıynsha júrgizdi.
Sot talqylaýy barysynda memlekettik aıyptaýshy sotqa sottalýshylardyń áreketteriniń zańǵa qaıshylyǵyn tolyq dáleldeıtin jetkilikti dáleldemeler usyndy.
Іsti qaraý qorytyndysy boıynsha sot uıymdasqan qylmystyq toptyń múshelerin taǵylǵan aıyptardyń barlyq tarmaǵy boıynsha kináli dep tanyp, olarǵa 10 jyldan 15 jylǵa deıingi merzimge bas bostandyǵynan aıyrý jazasyn taǵaıyndady.
Úkim zańdy kúshine engen joq.
Aıta keteıik, sáýir-mamyr aılarynda terrorızm men ekstremızm úshin 13 adam sottaldy.
