Almaty oblysynda sottalǵandar nesıe rásimdep, kazıno oınaǵan

QONAEV. KAZINFORM — Almaty oblysynyń prokýratýrasy túzeý mekemelerinde zańsyzdyqtardy anyqtady.

Prokýratýra málimetinshe,sottalǵandar, uıaly telefondar paıdalaný arqyly onlaın satyp-alýdy, kredıtterdi rásimdep jáne býkmekerlik keńseler men onlaın-kazıno arqyly qumar oıyndarǵa qatysqan. Túrmedegi aqsha aınalymy 3 mlrd teńgeden asqan.

«№10-shy mekemeniń sottalǵandary, mobıldi qurylǵylardy qoldana otyryp, ruqsat etilgen jáne tyıym salynǵan zattardy mekeme ishinde satqan. Atalǵan derek boıynsha Almaty oblysynyń prokýratýrasymen QK-niń 361-baby 2-1-bóligi boıynsha sotqa deıingi tergep-tekserý júrgizildi»,- dep habarlady vedomstvodan.

Іle aýdandyq sotynyń úkimimen osy mekemeniń úsh qyzmetkerine túrli jazalaý sharasy qabyldandy.

Budan basqa, oblys prokýratýrasy QK-niń 361-baby 2-1-bóligi boıynsha №12 jáne №57 mekemelerdiń qyzmetkerlerine qatysty sotqa deıingi tergep-tekserýdi bastady, №57 mekeme bastyǵyna qatysty qamaýda ustaý túrindegi bultartpaý sharasy qoldanyldy. 

«Anyqtalǵan derekter, qylmystyq-atqarý júıesindegi mekeme qyzmetkerleriniń qatysýymen buzýshylyqtardyń jalǵasyp jatqandyǵyn aıǵaqtaıdy. Tergeý jalǵasýda jáne qazirgi ýaqytta QPK-niń 201-babyna sáıkes ózge aqparat jarııalanýǵa jatpaıdy»,- dep atap ótti Almaty oblystyq prokýratýrasy.