Almaty oblysynda shomylý maýsymy bastalǵaly 13 adam sýǵa ketti
QONAEV. KAZINFORM — Almaty oblysynda sý aıdyndaryndaǵy qaýipsizdik sharalary kúsheıtildi.
Oblystyq TJD Tótenshe jaǵdaılardy joıý basqarmasynyń bastyǵy Arman Makenovtyń aıtýynsha, búginde oblys aýmaǵynda shomylýǵa ruqsat etilgen 125 oryn belgilengen. Onyń ishinde 7 kommýnaldyq jáne 118 jekemenshik demalys aımaǵy jumys isteıdi. Demalýshylardyń negizgi bóligi Qapshaǵaı sý qoımasyna keledi.
— Demalys jáne mereke kúnderi munda bir mezgilde 10 myńnan asa adam jınalatyndyqtan, qaýipsizdikti qamtamasyz etý sharalary erekshe baqylaýǵa alyndy. Osyǵan baılanysty tótenshe jaǵdaılar departamenti sý aıdyndaryndaǵy jaǵdaıǵa turaqty monıtorıng júrgizip, kúndelikti profılaktıkalyq jáne reıdtik is-sharalardy uıymdastyryp keledi, — dedi ol.
Jalpy reıdtik is-sharalar zań talaptaryn buzǵan 10 shaǵyn kólemdi keme anyqtalyp, aıyppul turaǵyna qoıylǵan. Odan bólek bıyl sý aıdyndaryndaǵy qaýipsizdik talaptaryn buzǵany úshin Ákimshilik quqyq buzýshylyq týraly kodekstiń 412-baby boıynsha 140 azamat ákimshilik jaýapkershilikke tartylyp, jalpy somasy 2,3 mıllıon teńgeden astam aıyppul salynǵan. Sondaı-aq Ákimshilik quqyq buzýshylyq týraly kodekstiń 582-baby boıynsha 70 quqyq buzýshy jaýapkershilikke tartylyp, 1,5 mıllıon teńgeden astam aıyppul óndirilgen.
Arman Makenovtyń aıtýynsha, shomylý maýsymy bastalǵaly Almaty oblysynyń sý aıdyndarynda 13 adam mert boldy, onyń tórteýi bala. Odan bólek qutqarýshylar 35 adamnyń ómirin saqtap qalǵan.
Eske salaıyq, Taldyqorǵanda qalalyq jaǵajaıdan er adamnyń máıiti tabyldy.
