Almaty oblysynda shomylý maýsymynda 14 adam sýǵa ketti
QONAEV. KAZINFORM - Almaty oblysy Óńirlik kommýnıkatsııalar qyzmeti alańynda oblystaǵy shomylý maýsymy men qutqarý jumystarynyń nátıjesi aıtyldy.
Almaty oblystyq Tótenshe jaǵdaılar departamentiniń Azamattyq qorǵanys basqarmasynyń aǵa ofıtseri Dıdar Asqarbekuly adamdardyń qaza bolý jaǵdaılaryn azaıtý úshin keń aýqymdy jumystar atqarylyp, baqylaý kúsheıtilgenin málimdedi.
Onyń aıtýynsha, bıylǵy maýsymda azamattardyń qaýipsizdigin qamtamasyz etý úshin «Sý aıdyndaryndaǵy qaýipsizdik sharalarynyń jospary» qabyldanyp, táýlik boıy baqylaý jáne arnaıy reıdter uıymdastyryldy. Qutqarý qyzmetterine volonterler men áskerı bólimsheler de belsene qatysqan.
- 2024 jylǵy shomylý maýsymynda sýǵa batyp qaza bolǵandar sany ótken jylmen salystyrǵanda edáýir azaıdy. Bıyl 14 adam sýǵa batsa, 2023 jyly bul kórsetkish 18 boldy. Erekshe qýantarlyq jaıt – bıyl balalardyń sýǵa batý oqıǵalary tirkelmegen. Qaýipsizdikti qamtamasyz etý maqsatynda shomylýǵa ruqsat etilgen oryndardyń sany da edáýir artty. 2023 jyly tek 7 oryn ruqsat etilse, bıyl olardyń sany 103-ke jetti. Onyń ishinde 7 kommýnaldyq jáne 96 jeke jaǵajaı qyzmet kórsetti, - dedi Dıdar Asqarbekuly.
Sonymen qatar, ol jaǵajaı aımaqtaryn baqylaý kezinde drondardy paıdalaný óz tıimdiligin dáleldegenin atap ótti.
- Dron birneshe shaqyrym jaǵalaýdy baqylaýǵa múmkindik beredi, bul bir adamnyń nemese qutqarý komandasynyń qolynan kelmeıtin jumys. Bul óte jaqsy tájirıbe jáne biz ony odan ári damytýdy josparlap otyrmyz. Drondardyń sanyn kóbeıtip, olardyń ushýyn aeronavıgatsııalyq qyzmettermen kelisý protsesin ońtaılandyrýdy kózdep otyrmyz, – dedi ol.
Eske salaıyq, buǵan deıin Qonaevqa kelýshiler byltyrǵydan 300 myńǵa artqanyn jazǵanbyz.
