Almaty oblysynda shákirtterin urǵan ustazdy QMDB jumystan shyǵardy
QONAEV. KAZINFORM – Almaty oblysy Qarasaı aýdanyndaǵy meshitte sabaq kezinde jasóspirimderdi urǵan ustaz jumystan shyǵaryldy.
Áleýmettik jelide meshittegi oqý synybyna ornatylǵan beınebaqylaý kamerasyna túsirilgen vıdeo tarady. Vıdeoda oqytýshynyń jasóspirimderdi birneshe ret uryp, qamshyǵa uqsas zatpen “tárbıelemek bolǵanyn” kórýge bolady.
QMDB oqıǵa bıyl maýsymda "Túrkistan-1" meshitinde bolǵanyn rastady. Meshitte "Imanı jaz" atty dinı saýattylyq boıynsha jazǵy sabaqtar ótken.
Dinı basqarmanyń málimetinshe, oqýshylar arasynda janjal týyndaǵan. Meshit oqytýshysy Dúısenhan Nurberdi balalardy tártipke shaqyrmaq bolǵan deıdi.
- Dúısenhan Nurberdi emotsııaǵa berilip, pedagogıkalyq ádepke saı kelmeıtin áreketke jol bergen. Oqıǵa týraly aqparat taraǵannan keıin meshitte arnaıy jıyn ótkizildi. Oqytýshy óz qateligin moıyndap, oqýshylardyń ata-analarynan keshirim suraǵan, - dep málimdedi QMDB.
Sondaı-aq QMDB ata-analardyń oqytýshyǵa qatysty shaǵymy joq ekenin jazbasha túrde rastap, tıisti beınejazbalardy usynǵanyn habarlady.
Osy jaıttan soń, Dúısenhan Nurberdi meshit oqytýshysy qyzmetinen bosatyldy.
Almaty oblystyq polıtsııa departamenti “kámelet jasqa tolmaǵan balany uryp-soǵý” deregi boıynsha qylmystyq is qozǵalǵanyn málimdedi.
- Qazir kámeletke tolmaǵandar men olardyń ata-analaryna qatysty qajetti protsessýaldyq áreketter júrgizilip jatyr. Tergeý barysy baqylaýda. Muǵalimniń áreketine zańǵa sáıkes quqyqtyq baǵa beriledi, - delingen habarlamada.
Eske salaıyq, kámelet jasqa tolmaǵan balalardy meshit ishinde uryp-soqqan aqtóbelik sottalǵan edi.
