Almaty oblysynda shaǵyn avtobýs apatqa ushyrap, tórt adam mert boldy

QONAEV. KAZINFORM – Almaty-Qorǵas tas jolynda shaǵyn avtobýs aýdarylyp, saldarynan tórt adam mert boldy.

Almaty oblysy polıtsııasynyń málimetinshe, adam shyǵynyna ákelgen jol apaty 12 maýsym kúni Almaty-Shelek-Qorǵas tas jolynyń 105-shi shaqyrymynda boldy.

Toyota Hiace júrgizýshisi rýlge ıe bola almaı, kólik aýdarylyp ketken.

«Saldarynan tórt adam sol jerde kóz jumdy. Júrgizýshi men taǵy eki jolaýshy Shelek aýylyndaǵy aýrýhanaǵa jatqyzyldy. Qajetti saraptamalar taǵaıyndalyp, is qozǵaldy», - dep habarlady polıtsııa departamentinen.

Osyǵan deıin 8 maýsym kúni Almaty oblysy Esik qalasynda 14 jáne 3 jastaǵy eki qyzdy kólik qaǵyp, mert qylǵan edi.