Almaty oblysynda sibir jarasy kómilgen qorym ústinde úıler salynyp jatyr ma

QONAEV. KAZINFORM – Almaty oblysynyń ákimdigi Baıserke aýylynyń turǵyndary úshin sibir jarasynyń qaýpi joq ekenin málimdedi.

Eki aı buryn Baıserke aýylynyń turǵyndary óz úıleri buryn sibir jarasyna shaldyqqan janýarlar kómilgen aýmaqta salynýy múmkin ekenin bilgen. Bul jaǵdaı aýyl turǵyndary arasynda alańdaýshylyq týǵyzdy.

Oblys ákimdiginiń málimetinshe, Іle aýdany Baıserke aýylynda sibir jarasyna qatysty bir qorym rasymen de bar. Biraq atalǵan qorym jeke menshik jer teliminde - «Transpetroleým» JShS aýmaǵynda ornalasqan. Arhıv derekterine sáıkes, munda 1958 jyly bir iri qara mal, al 1968 jyly eki jylqy jerlengen.

Nysannyń aınalasynda radıýsy 1000 metr bolatyn sanıtarlyq-qorǵaý aımaǵy belgilengen. Atalǵan aımaq Baıserke aýylynyń bir bóligin jáne Talǵar aýdanyna qarasty Kishi Baıserke aýylynyń keıbir jer telimderin qamtıdy.

- Sanıtarlyq-qorǵaý aımaǵyna kiretin turǵyn úıler men basqa da nysandardy kóshirý nemese buzý máselesi qarastyrylyp jatqan joq. Qazirgi ýaqytta, jergilikti turǵyndarǵa eshqandaı qaýip tónip turǵan joq, - dep habarlady ákimdikten.

Máseleni jan-jaqty zerdeleý jáne qajetti sharalardy anyqtaý maqsatynda aýdan ákiminiń ókimimen jumys toby qurylǵan. Onyń quramyna aýdandyq veterınarııalyq ınspektsııa men veterınarııa bólimi, sanıtarııalyq-epıdemıologııalyq baqylaý bólimi, jer qatynastary, sáýlet jáne qala qurylysy bólimderiniń ókilderi, sondaı-aq «Qazaq ǵylymı-zertteý veterınarııa ınstıtýty» JShS-nyń ǵylymı keńesshileri, aýyldyq okrýg ákimdigi men aýyl belsendileri endi.

- Qazirgi ýaqytta jumys toby ǵylymı mamandarmen birlesip zertteý jumystaryn júrgizip jatyr. Top eki otyrys ótkizip, onda qorymnyń naqty ornalasqan jerin anyqtaý, sanıtarlyq-qorǵaý aımaǵyn naqtylaý jáne qaýipsizdik sharalaryn qamtamasyz etý boıynsha usynystar ázirlendi. Arhıvtik qujattar men jınalǵan derekter taldanýda. Qorym men onyń sanıtarlyq-qorǵaý aımaǵyna qatysty túpkilikti sheshim aldaǵy bir aı ishinde jumys tobynyń qorytyndy otyrysynda qabyldanady. Nátıjesinde tıisti sharalar belgilenedi, - dep habarlady ákimdikten.

Sonymen qatar Іle aýdany ákiminiń 2016 jyldyń 8 sáýirindegi «Aýdan aýmaǵyndaǵy sibir jarasy qorymdarynyń oryndaryn anyqtaý týraly» sheshimine tıisti ózgerister engizilmek.

Eske salaıyq, buǵan deıin Batys Qazaqstanda kómilgen sibir jarasy oshaǵynan qandaı qaýip bar ekenin jazǵanbyz.