Almaty oblysynda Respýblıka kúni qarsańynda 35 azamat memlekettik marapatqa ıe boldy
QONAEV. KAZINFORM — Almaty oblysynda Respýblıka kúni qarsańynda muǵalim, dáriger, jumysshy mamany jáne ózge de sala úzdikterinen quralǵan 35 azamat marapattaldy. Olarǵa «Parasat», «Qurmet» ordeni, «Eren eńbegi úshin» jáne «Shapaǵat» medali, sondaı-aq «Memlekettik qyzmet ardageri» ataǵy berildi. Onyń ishinde qos birdeı azamat memlekettik nagradany Memleket basshysy Qasym-Jomart Toqaevtyń qolynan aldy.
Qonaev qalasynda ótken merekelik sharaǵa Almaty oblysynyń ákimi Shyńǵys Árinov qatysyp, jınalǵan qaýymdy Respýblıka kúnimen quttyqtady.
— 25 qazanda Memlekettik sýverenıtet týraly Deklaratsııanyń qabyldanýy — halqymyzdyń tarıhı tańdaýyn aıqyndaǵan, derbestigin tórtkúl dúnıege jarııa etken aıryqsha sát. Eldigimizdiń altyn dińgegi bolǵan osy qasterli kúnniń mańyzyn eskere otyryp, Memleket basshysy Qasym-Jomart Toqaev Respýblıka kúnin atap ótý dástúrin qaıta jańǵyrtty, Ulttyq mereke mártebesin berdi. Bıyl memleketimiz úshin taǵy bir aıtýly beles — Qazaqstan Respýblıkasy táýelsizdiginiń 35 jyldyǵy. Osy bir shırek ǵasyrdan astam ýaqyt azattyǵymyzdy bekemdep, eńsemizdi tiktegen kezeń boldy. Osynaý uly kóshte Almaty oblysynyń da ózindik óreli úlesi bar. Aldymyzda halyqtyń turmysyn odan ári jaqsartyp, elimizdi ozyq memleketter qataryna qosý jospary tur. Bul — ult taǵdyry men keler býyn aldyndaǵy jaýapkershilik, — dedi Shyńǵys Saıranuly.
Marapatqa ıe bolǵandardyń biri — bilim salasynda uzaq jyl eńbek etken ustaz Gúlnar Asqarbaeva.
— Ulttyq mereke qarsańynda «Shapaǵat» medalimen marapattaldym. Bul men úshin — úlken jaýapkershilik ári joǵary mártebe. Munyń artynda tutas bir ujymnyń úlken eńbegi men izdenisi jatyr. Tynbaı istegen jumysyń baǵalanǵanda, qanattanyp, uly isterdi atqarýǵa degen talpynysyń oıanady. Sondyqtan bul syı-qurmetti ıelengenime óte qýanyshtymyn. Osy oraıda, barsha halyqty Ulttyq merekemen quttyqtaımyn. Beıbitshiligimiz ben egemendigimiz máńgi bolsyn, — dedi ustaz.
Aıta keteıik, Almaty oblysynda Respýblıka kúni aıasynda 200-den astam is-shara ótedi. Ár aýdan, qalada zııatkerlik oıyndar jáne aýyl sharýashylyǵy jármeńkeleri, sport jarystary men týrnırler, kontsertter men kórmeler, senbilikter men qaıyrymdylyq is-sharalary uıymdastyrylyp jatyr.
Birqatar eldi mekende jańa áleýmettik nysandar ashylyp, turǵyndardyń ıgiligine baǵyttalǵan jobalar iske qosyldy. Sharalar legi aldaǵy kúnderi de jalǵasyn tabady.
