Almaty oblysynda polıtsııa qyzmetkerin kóligimen súırep ótken júrgizýshi ustaldy

QONAEV. KAZINFORM - Almaty oblysynda jol qozǵalysy erejelerin buzǵan júrgizýshi polıtseıdi óz kóligimen birneshe metrge súırep ótti.

Baıseıit aýylynda senip tapsyrylǵan ýchaskeni baqylaý kezinde, patrýldik polıtsııa batalonynyń qyzmetkerleri, polıtsııa kapıtany Qanat Temirbaev pen Eldar Mahmýdov jol erejesin buzǵany úshin Toyota Ipsum avtokóligin toqtatqan.

- Hattamany toltyrý kezinde Dostyq aýylynyń 34 jasar júrgizýshisi zańdy talaptarǵa baǵynýdan bas tartty. Polıtseılerdi elemeı, kólikke otyryp, kapıtan Temirbaevtyń saýsaqtaryn esigimen qysyp qalǵanyna qaramastan, ornynan jyldam qozǵalyp, ofıtserdi shamamen 10-15 metr súırep ótti. Polıtsııa qyzmetkeri tas joldyń ústine qulap, jaraqat aldy, - dep habarlady oblystyq Polıtsııa departamentiniń baspasóz qyzmeti.

Oqıǵa ornynan qashqan quqyqbuzýshy kóp uzamaı ustalyp, Shelek aýylynyń polıtsııa bólimine jetkizilgen. Onyń ústinen bılik ókiline qatysty kúsh qoldaný faktisi boıynsha qylmystyq is qozǵaldy. Sonymen qatar, oǵan jol qozǵalysy erejelerin buzǵany úshin ákimshilik hattama toltyryldy.

Eske salaıyq, buǵan deıin Almaty oblysynda atys bolyp, úsh adam zardap shekkenin jazǵanbyz.