Almaty oblysynda paıdalanylmaıtyn aýyl sharýashylyǵy jerleri qaıtarylyp jatyr
QONAEV. KAZINFORM — Almaty oblysynda 81,4 myń gektar jer memleket menshigine qaıtaryldy.
Almaty oblystyq Jer qatynastary basqarmasynyń basshysy Amanjol Kenesbaevtyń sózinshe, óńirde paıdalanylmaı kelgen 1322 jer ýchaskege bólingen 393,1 myń gektar jer anyqtaldy.
«Paıdalanylmaı jatqan jerlerdi memleket menshigine qaıtarý — oblystyń jer resýrstaryn tıimdi paıdalanýǵa múmkindik beretin strategııalyq mindet. Biz ár gektar aýyl sharýashylyǵy jeri qoǵam men ekonomıkaǵa paıda ákelýi úshin jumys istep jatyrmyz», — dedi Amanjol Keńesbaev.
Qazir 81,4 myń gektar jer memleket menshigine qaıtaryldy. Jyl sońyna deıin taǵy 70,0 myń gektar jerdi qaıtarý josparda.
«Keıbir jaǵdaılarda paıdalanylmaı jatqan jerler sot sheshimderi arqyly memleket menshigine qaıtarylady. Mysaly, jalpy kólemi 31,9 myń gektar bolatyn 63 jer ýchaskesi boıynsha jalǵa alý sharttaryn buzý týraly sot sheshimderi qabyldandy. Sonymen qatar, kólemi 49,4 myń gektar bolatyn 246 jer ýchaskesi erikti túrde jáne basqa da joldarmen memleket menshigine qaıtaryldy», — dep atap ótti ol.
Jer qatynastary basqarmasy sondaı-aq jerge salynatyn salyqtyń tıimdiligin arttyrý úshin 162,3 myń gektar jerge arnalǵan 454 materıaldy 20 ese salyq stavkasyn arttyrý úshin hat jibergenin habarlady.
«Memlekettik kirister departamentine 18,2 myń gektar jerdi qamtıtyn 164 ýchaske boıynsha joǵary salyq stavkalaryn qoldaný úshin materıaldar jibergen. Qazir basqarmada taǵy 74,3 myń gektar jer boıynsha jumys júrgizilip jatyr», — dedi basqarma basshysy.
Osyǵan deıin óńirde jalpy aýmaǵy 72,9 myń gektar bolatyn, 257 jer ýchaskesi memleket menshigine qaıtarylǵany týraly jazǵan edik.
