Almaty oblysynda paıdalanylmaı jatqan jerler memleketke qaıtarylyp jatyr
ASTANA. KAZINFORM — Almaty oblysynda 2022 jyldan bastap jerdi memleket menshigine qaıtarý baǵytynda josparly jumys júrgizilip keledi. Búginde jalpy aýmaǵy 483,6 myń gektardy quraıtyn 1 488 jer telimi memleketke qaıtaryldy. Bul týraly oblystyń resmı saıty jarııalady.
Qaıtarylǵan jerlerdiń ıgerilýi:
- 165,6 myń gektar konkýrs arqyly aýyl sharýashylyǵy aınalymyna engizildi;
- 142,3 myń gektar aýyldyq okrýgterge bekitilip, turǵyndardy jaıylymmen qamtamasyz etýge baǵyttaldy;
- 18,6 myń gektar ınvestıtsııalyq jobalardy júzege asyrýǵa berildi.
2022–2025 jyldary aýdan jáne qala ákimdikteri QR Jer kodeksiniń 92, 94 jáne 147-baptaryna sáıkes jalpy aýmaǵy 195,6 myń gektardy quraıtyn 930 paıdalanylmaı jatqan jer ýchaskesine qatysty materıaldardy Jer resýrstaryn basqarý departamentine joldady.
2025 jyldyń basynan beri Qonaev qalasynyń ákimdigi de bul baǵyttaǵy jumystardy kúsheıtip, JRBD-ǵa 55 jer ýchaskesi boıynsha (42-si — kommertsııalyq, 13-i — aýyl sharýashylyǵy maqsatyndaǵy) qujattardy joldady. Atalǵan jerler Kapshagaı sý qoımasy men Іle ózeniniń mańynda ornalasqan. Sonymen qatar jer paıdalanýshylarǵa 61 eskertý-hat jiberildi.
Burynǵy laýazymdy tulǵalarǵa tıesili bolǵan keıbir jerlerge qatysty derekter de qarastyrylyp jatyr.
- 2006 jyly Іle aýdany ákimdiginiń qaýlysymen «Montajnık» sharýashylyǵyna 13 883,9 ga jer bólingen;
- 2005–2007 jyldary «DALA INVEST GROUP» JShS-ne 2 952,07 ga jer berilgen;
- 2022 jyly «AL-AGRO GROUP» JShS-ne 44,93 ga jer notarıaldyq kelisim negizinde ótken;
- Alataý qalasynda 28,7 ga jer telimi tirkelgen;
- 2013–2025 jyldary «Billboards Empire» JShS Іle aýdanynda, Qonaev jáne Alataý qalalarynda jarnamalyq bılbordtarǵa arnalǵan 38 jer ýchaskesin rásimdegen.
Barlyq sheshimder qoldanystaǵy zańnamaǵa sáıkes qabyldandy. QR Jer kodeksiniń 147-babyna sáıkes, jerdi bólý jáne paıdalaný zańdylyǵyn tekserý quzyreti Jer resýrstaryn basqarý departamentine tıesili. Qajetti sharalar qabyldanǵannan keıin qosymsha aqparat resmı túrde jarııalanatyn bolady.
Jalpy elimizde 3 jylda memlekettik jer qoryna 13,2 mln gektar jer qaıtaryldy.
Al Shyǵys Qazaqstan oblysyndaǵy keı aýdan paıdalanylmaı jatqan jerlerdi qaıtarýǵa asyǵar emes.