Almaty oblysynda patrýldik polıtseı janarmaı beketindegi jarylystyń aldyn aldy

ALMATY. KAZINFORM — Almaty oblysynda polıtsııa qyzmetkeri janarmaı beketindegi jarylystyń aldyn aldy. Bul týraly Polisia.kz jazdy.

Almaty oblysynda patrýldik polıtsııa qyzmetkeri batyldyq pen sabyrlyq tanytyp, janarmaı beketinde jarylystyń aldyn aldy. Oqıǵa 10 mamyr kúni Uzynaǵash aýylynda boldy. Qyzmettik aýmaǵyn baqylaý kezinde patrýldik polıtsııa ınspektory Mıras Tastandy janarmaı quıý beketinde turǵan GAZel kóliginiń otqa oranǵanyn baıqady. Jaǵdaıdyń aýyr ekenin jáne jarylys qaýipin túsingen polıtseı sol jerdegi eki azamatpen birge otty sóndirýge dereý kirisken. Olardyń jedel ári úılesimdi áreketiniń arqasynda órt der kezinde toqtatyldy. Aıta ketý kerek, eger eshkim áreket etpegende, jalyn janarmaı saqtalǵan rezervýarlarǵa jetip, aýyr zardaptarǵa soqtyrýy múmkin edi.

– Inspektordyń batyl sheshimi men azamattardyń jaýapkershiligi arqasynda qaıǵyly jaǵdaıdyń joly kesildi. Mundaı oqıǵalar polıtsııa qyzmetkeri – jaı ǵana forma kıgen adam emes, qoǵam qaýipsizdigi úshin árqashan daıyn turǵan tulǵa ekenin dáleldeıdi. Biz qyzmetkerlerimizben maqtanamyz jáne syn saǵatta beıjaı qalmaǵan ár azamatqa alǵysymyzdy bildiremiz, – dep atap ótti vedomstvoda.

Aıta keteıik, buǵan deıin polıtsııa Qyzylorda-Aqtóbe baǵytyndaǵy jolda drondardy iske qosqan bolatyn.