Almaty oblysynda órtten úsh adam qaza boldy

ALMATY. KAZINFORM - Almaty oblysyndaǵy Qaraısaı aýdanyna qarasty Turar aýylynda qurǵaq shóp órtenip, ol aýyl mańyndaǵy saıadaılar men sharýashylyq qurylystardy da sharpydy. Órt saldarynan úsh adam mert boldy.

Almaty oblysy Tótenshe jaǵdaılar departamentiniń derekterinshe, órt 30 tamyz kúni saǵat 15:50-de bastalǵan. Tilsiz jaý shamamen 30 gektar aýmaqqa jaıylyp, jeti saıajaı úıin, alty sharýashylyq nysandy, Honda Civic avtokóligin, shóp qoımasyn, bastyrma men turǵyn úıdi sharpyǵan. Órt sóndirýshiler jetken kezde búkil aýmaq janyp jatqan.

Órtti sóndirýge Almaty oblysy TJD, Almaty qalasynan arnaıy bólimsheler jáne jergilikti atqarýshy organdardyń kúshi tartyldy. Barlyǵy 27 adam men 10 tehnıka jumyldyryldy. Qutqarýshylardyń áreketiniń arqasynda órt 00:20-de aýyzdyqtaldy.

— Órt ornynan úsh adamnyń denesi tabyldy. Oqıǵaǵa baılanysty sot-medıtsınalyq saraptama taǵaıyndaldy. Órttiń sebebin anyqtaý úshin Almaty oblysy TJD anyqtaý bólimshesi men órt sebepterin zertteý zerthanasynyń ókilderi jumys istep jatyr, — dep habarlady vedomstvodan.

Osyǵan deıin Almaty oblysyndaǵy taýly aımaqtan órt shyqqany týraly habarladyq.